عزيز صدّيق قارداشلرم خواجه صبرى، حافظ على، مسعود، مصطفى‌لر، خسرو، رأفت، بكر بك، رشدى، لطفيلر، حافظ أحمد، شيخ مصطفى وسائره...

سزلره مراقلى و مدارِ سؤال اولمش ”درت كوچك مسئله“يى معلومات قبيلندن مختصر بر صورتده بيان ايتمكلگه قلبمده بر خاطره حسّ ايتدم.

برنجيسى: قارداشلريمزدن چاپراززاده عبد اﷲ أفندى گبى بعض آدملر، أهلِ كشفدن روايةً بو گچن رمضانده أهلِ سنّت و جماعت ايچون بر فرَج، بر فتوحات اولاجغنى خبر ويردكلرى حالده ظهور ايتمدى. بويله أهلِ ولايت و كشف، نه‌دن خلافِ واقع خبر ويرييورلر؟ بندن صورديلر. بن ده بردن سنوحات قبيلندن اولارق ويرديگم جوابڭ مختصرى شودر:

حديثِ شريفده وارد اولمشدر كه: ”بعضًا بلا نازل اولويور؛ گليركن قارشيسنه صدقه چيقار، گرى چويرر.“ شو حديثڭ سرّى گوسترييور كه: مقدّرات، بعض شرائطله وقوعه گليركن گرى قالير. ديمك أهلِ كشفڭ مطّلع اولديغى مقدّرات مطلق اولماديغنى، بلكه بعض شرائطله مقيّد بولونديغنى و او شرائطڭ وقوع بولماماسيله او حادثه ده وقوعه گلمييور. فقط او حادثه، أجلِ معلّق گبى لوحِ أزلينڭ بر نوع دفترى حكمنده اولان لوحِ محو إثباتده مقدّر اولارق يازيلمشدر. غايت نادر اولارق لوحِ أزلى‌يه قدر كشف چيقار. أكثرى اورايه چيقامييور. ايشته بو سرّه بناءً، گچن رمضانِ شريفده و قربان بايرامنده و داها باشقه وقتلرده إستخراجه بناءً ويا كشفيات نوعندن ويريلن خبرلر، معلّق اولدقلرى شرائطى بولامدقلرى ايچون وقوعه گلمه‌مشلر و خبر ويرنلرى تكذيب ايتمييورلر. چونكه مقدّر ايمش، فقط شرطى گلمه‌دن او ده وقوعه گلمه‌مش. أوت رمضانِ شريفده بدعه‌لرڭ رفعنه أهلِ سنّت و جماعتڭ أكثريتله خالص دعاسى بر شرط و بر سببِ مهمّ ايدى. مع الأسف جامعلره رمضانِ شريفده بدعه‌لر گيرديگندن، دعالرڭ قبولنه سد چكوب فرَج گلمدى. ناصلكه سابق حديثڭ سرّيله: صدقه، بلايى رفع ايدر. أكثريتڭ خالص دعاسى دخى، فرَجِ عمومى‌يى جذب ايدر. قوّۀِ جاذبه وجوده گلمديگندن، فتوحات ده ويريلمدى