هم او گتيرديگى نور و هديه ايله، بنم بو دنيامى تنوير ايتديگى گبى، هركسڭ بو دنياده‌كى دنيالرينى تنوير ايدييور، نعمتلنديرييور دييه، او هديه‌سنه شاكرانه بر مقابله نوعندن ”بيڭلر صلوات سڭا اينسين!“ ديدم. يعنى سنڭ بو اييلگڭه قارشى بز مقابله ايده‌مييورز، بلكه خالقمزڭ خزينۀِ رحمتندن گلن و سماوات أهلنڭ عددنجه رحمتلر سڭا گلمه‌سنى نياز ايله شكرانمزى إظهار ايدييورز، معناسنى خيالاً حسّ ايتدم.

او ذاتِ أحمديه (ع‌ص‌م) عبوديتى جهتيله (خلقدن حقّه توجّهى حسبيله) رحمت معناسنده‌كى صلاتى ايستر. رسالتى جهتيله (حقدن خلقه ايلچيلگى حيثيتيله) سلام ايستر. ناصلكه جنّ و إنس عددنجه سلامه لايق و جنّ و إنس عددنجه عمومى تجديدِ بيعتى تقديم ايدييورز. اويله ده، سماوات أهلى عددنجه، خزينۀِ رحمتدن هر برينڭ نامنه بر صلاته لايقدر. چونكه گتيرديگى نور ايله هر بر شيئڭ كمالى گورونور و هر بر موجودڭ قيمتى تظاهر ايدر و هر بر مخلوقڭ وظيفۀِ ربّانيه‌سى مشاهده اولونور و هر بر مصنوعده‌كى مقاصدِ إلٰهيه تجلّى ايدر. اونڭ ايچون هر بر شى، لسانِ حال ايله اولديغى گبى، لسانِ قالى ده اولسه ايدى، {اَلصَّلاَةُ وَ السَّلاَمُ عَلَيْكَ يَا رَسُولَ اﷲ} دييه‌جكلرى قطعى اولديغندن بز عموم اونلرڭ نامنه {اَلْفُ اَلْفِ صَلاَةٍ وَ اَلْفُ اَلْفِ سَلاَمٍ عَلَيْكَ يَا رَسُولَ اﷲِ بِعَدَدِ اْلجِنِّ وَ اْلاِنْسِ وَ بِعَدَدِ اْلمَلَكِ وَ النُّجُومِ} معنًا ديرز.