(٢٠): {مَحَامِدْ} حاضر حمدلرى مراد ايدوب، {مَدَائِحْ} دائمى و ثابت ثنالردر كه، گويا حاضر حمدلرڭ ماضى و مستقبلى إحاطه ايدن سلسلۀِ أمثالندن تظاهر ايدن ثنالردر

(٢١): {كَمَالاَتْ} معبوديتى إقتضا ايدن كمالات ديمكدر. يعنى عابدلر عبادتلريله گيتسه ده، معبوديتى إستلزام ايدن كمالات باقيدرلر. بتون گلن سلسله‌لرى، گچنلر يرينه عبادته سَوق ايدر

(٢٢): {وَ التَّحِيَّاتُ} يعنى: بتون ذى‌حياتلرڭ آثارِ حياتلرينى منتظمًا مرادِ إلٰهى دائره‌سنده گوستردكلرى جهتله، صانعِ ذو الجلاللرينڭ صنعتنى آلقيشلايورلر. ناصلكه بر ذات خارقه بر ماكينه ياپسه، او ماكينه‌نڭ باشنده بر فونوغراف، بر فوطوغراف گبى آيرى آيرى كندى كندينه ايشلر، قونوشور، يازار، مخابره ايدر جهازات بولونسه، او آدمڭ ايستديگى طرزده ايشله‌سه، نتيجه‌لرينى گوزلجه ويرسه؛ او ماكينه‌يه باقان ناصلكه او آدمى ما شاء اﷲ و بَارَكَ اﷲلر ايله آلقيشلار، معنوى هديه‌لر ويرر. عينًا او ماكينه ده، اوندن مقصود اولان نتيجه‌لرى، أثرلرى مكمّل إظهار ايتمكله؛ او جهازاتڭ لسانِ حاليله، صنعتكارينى تقديرلر و تحسينلر و معنًا ماشاء اﷲلرله تبريك ايدوب آلقيشلار، تحيّه‌لر و هديه‌لر ويرر. ايشته بتون ذى‌حياتڭ هر بريسى باشنده پك چوق مختلف فونوغرافلر، فوطوغرافلر، تلغراف و تلفون ماكينه‌لرى گبى چوق ماكينه‌لر وار. اونلر خلقتلرنده‌كى نتائجى، مقصدلرى نهايت درجه‌ده مكمّل گوستردكلرندن، حياتلرينڭ تظاهراتيله، تحيّات تعبير ايديلن معنوى آلقيشلر، هديه‌لر، تبريكلر و تحسينلرله، صانعِ ذو الجلالنڭ تسبيحاتنى، هم كمالاتِ صنعتنى إعلان ايدييورلر ديمكدر. بز ايسه {اَلتَّحِيَّاتُ} ديمكله كندى لسانمزله او تحيّاتلرى ياد ايدوب، كندى حسابمزه درگاهِ إلٰهيه‌يه تقديم ايدرز. ذاتًا لسان، او ماكينه‌لردن بريسيدر و اوندن مطلوب نتيجه‌لردن برنجيسى، بر ترجمانلقدر