بر خلاصة الخلاصه: (حاشيه) إسمِ أعظمڭ آلتى إسمى، ضياده‌كى يدى رنك گبى إمتزاج ايده‌رك تشكيل ايتدكلرى ضياءِ قدسيه‌يه باقمق ايچون، بر خلاصه‌نڭ ذكرى مناسبدر. شويله كه

بتون كائناتڭ موجوداتنى بويله طورديران، بقا و قيام ويرن، إسمِ قيّومڭ بو جلوۀِ أعظمنڭ آرقه‌سندن باق: إسمِ حىّ‌ڭ جلوۀِ أعظمى، او بتون موجوداتِ ذى‌حياتى جلوه‌سيله شعله‌لنديرمش، كائناتى نورلانديرمش، بتون ذى‌حيات موجوداتى جلوه‌سيله يالديزلايور. شيمدى باق: إسمِ حىّ‌ڭ آرقه‌سنده إسمِ فردڭ جلوۀِ أعظمى، بتون كائناتى أنواعيله، أجزاسيله بر وحدت ايچنه آلييور؛ هر شيئڭ آلننه بر سكّۀِ وحدت قويويور؛ هر شيئڭ يوزينه بر خاتمِ أحديت باصييور؛ نهايتسز و حدسز ديللرله جلوه‌سنى إعلان ايتديرييور. شيمدى إسمِ فردڭ آرقه‌سندن إسمِ حَكمڭ جلوۀِ أعظمنه باق كه؛ ييلديزلردن ذرّه‌لره قدر، خيالڭ ايكى دوربينيله تماشا ايتديگمز موجوداتڭ هر بريسنى، جزئى اولسون، كلّى اولسون، أڭ بيوك دائره‌دن أڭ كوچك دائره‌يه قدر، هر برينه لايق و مناسب اولارق ميوه‌دار بر نظام و حكمتلى بر إنتظام و ثمره‌دار بر إنسجام ايچنه آلمش، بتون موجوداتى سوسلنديرمش، يالديزلانديرمش. صوڭره إسمِ حَكمڭ جلوۀِ أعظمى آرقه‌سندن باق كه، إسمِ عدلڭ جلوۀِ أعظميله (ايكنجى نكته‌ده ايضاح ايديلديگى وجهله) بتون كائناتى موجوداتيله، فعاليتِ دائمه ايچنده اويله حيرت‌أنگيز ميزانلرله، ئولچولرله، طارتيلرله إداره ايدر كه؛ أجرامِ سماويه‌دن برى، بر ثانيه ده موازنه‌سنى غائب ايتسه؛ يعنى إسمِ عدلڭ جلوه‌سى آلتندن چيقسه، ييلديزلر ايچنده بر هرج و مرجه، بر قيامت قوپماسنه سببيت ويره‌جك. ايشته بتون موجوداتڭ دائرۀِ أعظمى، كهكشاندن يعنى صمان يولى تعبير ايديلن منطقۀِ كبرادن طوت، تا قان ايچنده‌كى كريواتِ حمرا و بيضانڭ دائرۀِ حركتلرينه قدر هر بر دائره‌سنى، هر بر موجودينى حسّاس بر ميزان، بر ئولچو ايله بيچيلمش بر شكل و بر وضعيتله باشدن باشه ييلديزلر اوردوسندن، تا ذرّه‌لر اوردوسنه قدر بتون موجوداتڭ ”أمرِ كُنْ فَيَكُون“دن گلن أمرلره كمالِ مسخّريتله إطاعت ايتدكلرينى گوسترييور. شيمدى إسمِ عدلڭ جلوۀِ أعظمى آرقه‌سندن (برنجى نكته‌ده ايضاح ايديلديگى گبى) إسمِ قدّوسڭ جلوۀِ أعظمنه باق كه؛ كائناتڭ بتون موجوداتنى اويله تميز، پاك، صافى، گوزل، سوسلى، برّاق ياپار گوسترر كه؛ بتون كائناته و بتون موجوداته جميلِ مطلقڭ حدسز درجه‌ده جمالِ ذاتيسنه لايق و نهايتسز گوزل اولان أسماءِ حسنى‌سنه مناسب اولاجق گوزل آيينه‌لر شكلنى ويرمشدر