عزيز، صدّيق قارداشلرم!
    بو پارچه‌يى سزلر دخى رسالۀِ نورڭ مقبوليتنه إمضا باصان رساله‌لر و مكتوبلر مجموعه‌سنڭ باشنده يازارسڭز. أگر مجموعه‌لر اولماسه ده برنجى شعاعڭ باشنده يازارسڭز. بنى مراق ايتمه‌يڭز. ثوابڭ زياده اولماسى، بڭا صيقنتيلرى بر جهتده سَوْديرر و نورلرڭ إنتشارينه باشقه ساحه‌لرده ميدان آچار. عمومڭزه برر برر سلام...
    ”رسالۀِ نورڭ مقبوليتنه إمضا باصان و غيبى إشارتلر ايله اوندن خبر ويرن سكز پارچه‌دن برنجى پارچه‌در. عين مسئله‌يه، عين دعوايه إتّفاقلرى صراحت درجه‌سنده‌در. وحدتِ مسئله جهتيله او أماره‌لر بربرينه قوّت ويرر، تأييد ايدر. او سكزدن اوچ دانه‌سى، إمامِ على‌نڭ اوچ كرامتِ غيبيه‌سيله رسالۀِ نوردن خبر ويرمسنه دائردر. بو سكز پارچه‌يى آنقره أهلِ وقوفى تدقيق ايتمش، إعتراض ايتمه‌مشلر. يالڭز ديمشلر: ”بو يازيلمامالى ايدى. كرامت صاحبى، كرامتنى يازاماز.“ بن ده اونلره جواب ويردم كه:
    بو، بنم دگل، رسالۀِ نورڭ كرامتيدر. رسالۀِ نور ايسه، قرآنڭ ماليدر و تفسيريدر ديدم. اونلر صوصديلر، ديمك قبول ايتديلر. گرچه بو چشيد إكراملر يازيلماسه ايدى داها مناسبدى، فقط بو قدر حدسز معارضلر و چوق قوّتلى و كثرتلى دشمنلر قارشيسنده آز و فقير و ضعيف اولان بزلره قوّۀِ معنويه و غيبى إمداد و تشجيع و ثبات و متانت ويرمك ايچون مجبوريتِ قطعيه اولدى، بن ده يازدم. بنم بنلگمه بر خودفروشلق ويروب سقوطمه سبب اولسه ده، أهمّيتى يوق. بو خدمته، يعنى أهلِ ايمانى ضلالتِ مطلقه‌دن قورتارمغه (لزوم اولسه) دنيوى حيات گبى، اُخروى حياتمى ده فدا ايتمك بر سعادت بيليرم؛ بيڭلر دوستلرم و قارداشلريمڭ جنّته گيرمه‌لرى ايچون جهنّمى قبول ايدرم.“
❊ ❊ ❊