عزيز قارداشم!
    رسالۀِ نورڭ آووقاتى ضيايى بزم طرفمزدن هم چوق تشكّر، هم تبريك ايديڭز. چوقدن بَرى روحمه إخطار ايديلمش كه؛ ضيا نامنده بريسى، رسالۀِ نور نامنه بيوك بر خدمت ايده‌جك. بو مسئله گوستردى كه؛ او ضيا، بو ضيادر. بزلرى أبده قدر منّتدار أيلدى. محكمه‌ده ضبط كاتبى و أعضادن حَسْنا خانم و صورغو حاكمى گبى وجدانلى ذاتلره تشكّر ايدرز. و اونلرى اونوتميه‌جغمى؛ بِالخاصّه باشده مفتى عثمان، حسن فيضى اولارق چوق أهمّيتلى قارداشلريمه سلاممزى و منّتدارلغمزى بيلديريڭز. و حاكمِ عادل اولان ذاته، رسالۀِ نورڭ أكثر أجزالرينى اوڭا هديه ايتمك ايچون يازديرمغى قرار ويرديگمى سويله‌يڭز. و رسالۀِ نورڭ فخرى آووقاتى ضيايه؛ قسمِ مهمّنى يازديروب اوڭا هديه ايتمك نيّتنده‌يم.
    طبع اولونان آيت الكبرا رساله‌سنڭ بش يوز مطبوع نسخه‌لرى ده طبع ايدنلره ويريله‌جك مى؟ مراق ايدييورم.
    برى ده، إستانبولده مصادره ايديلن نه قدر رسالۀِ نور وارسه بڭا عائددر. ايچنده يگرمى رساله بولونان مجموعه بڭا چوق أهمّيتى وار.
    هم دڭزليدن مفارقت ايدركن، أمانت معجزاتِ أحمديه رساله‌سنى، اوراده بعضلرينه بيراقمشدم، او ده بڭا چوق لازمدر، بلكه خواجه موسى أفندى بيلييور.
❊ ❊ ❊
    رسالۀِ نورڭ ضعيف ويا يڭى شاكردلرينى وسوسه‌دن قورتارمق ايچون بيان ايدييورم كه: گيزلى بر قوميته‌نڭ دسيسه‌سيله صافدل بعض خواجه‌لر وياخود بدعه طرفدارلرى بعض معارضلر، رسالۀِ نورڭ هيچ زده‌لنمز بعض حقيقتلرينه قارشى گلمك ايچون، بنم چوق قصورلى و (إعتراف ايدييورم) چوق خطالى شخصمڭ نقصانلرينى و خطالرينى إشاعه ايتمك و بنى اونلر ايله چوروتمكله رسالۀِ نوره ايليشمك و ضربه وورمق ايستدكلرينڭ بو يگرمى سنه‌در يگرمى أهمّيتلى حادثه‌سى وار. حتّى ايكى دفعه حپسمزه ده بر نوع وسيله‌سى اولديغندن، دوستلريمه و رسالۀِ نورڭ شاكردلرينه إعلان ايدييورم كه: بن، جنابِ حقّه شكر ايدييورم كه؛ نفسمى كنديمه بگنديرمه‌مش و قصورلريمى كنديمه بيلديرمش. دگل كنديمى صاتمق، خودفروشلق ايتمك، بلكه كمالِ محجوبيتله رسالۀِ نورڭ مبارك شاكردلرى ايچنده اونلرڭ صميميت و إخلاصى ايله كنديمى عفو ايتديرمك و اونلرڭ معنوى شفاعتيله گناهلريمه بر كفّارت آرامقدر. بڭا إعتراض ايدنلر، گيزلى عيبلريمى بيلمييورلر. يالڭز ظاهرى بعض خطالريمى بهانه ايدوب و ياڭليش اولارق رسالۀِ نورى بنم مالم ظن ايدوب رسالۀِ نورڭ نورلرينه پرده چكمك، إنتشارينه رقابت ايتمك ايچون ديرلر: ”سعيد جمعه جماعتنه گلمييور، صقال بيراقمييور“ گبى تنقيدلرى وار.