ايشته بو سرّه بناءً آياتِ قرآنيه‌نڭ أهلِ تفسير طرفندن حدسز حقائقى بيان ايديلمش. مفسّرينڭ بيان ايتمديگى داها چوق حقائقى وار. و بِالخاصّه حروفاتنده و معناىِ صريحندن باشقه، إشاراتنده چوق علومِ مهمّه واردر.

ايكنجى نكته: ايشته بو آيتِ كريمه {مِنَ النَّبِيِّينَ وَ الصِّدِّيقِينَ وَ الشُّهَدَاءِ وَ الصَّالِحِينَ وَ حَسُنَ اُولٰئِكَ رَفِيقًا} تعبيريله، صراطِ مستقيمڭ أهلى و حقيقى نعمِ إلٰهيه‌يه مظهر، نوعِ بشرده‌كى طائفۀِ أنبيا و قافلۀِ صدّيقين و جماعتِ شهدا و أصنافِ صالحين و أنواعِ تابعينڭ بولوندقلرينى إفاده ايتمكله برابر، عالمِ إسلاميتده او بش قسمڭ أڭ مكمّلنى دخى آيريجه صراحةً گوستردكدن صوڭره او بش قسمڭ إماملرى و باشده‌كى رؤسالرينى صفاتِ مشهوره‌لريله ذكر ايتمكله اونلره دلالت ايدوب إفاده ايتديگى گبى، إخبارِ غيب نوعندن بر لمعۀِ إعجاز ايله او طائفه‌لرڭ إستقبالده‌كى رئيسلرينڭ وضعيتلرينى بر وجهله تعيين ايدييور. أوت {مِنَ النَّبِيِّينَ} ناصلكه صراحتله حضرتِ پيغمبر عليه الصلاة والسلامه باقييور. {وَالصِّدِّيقِينَ} فقره‌سيله أبو بكر الصدّيقه باقييور. هم پيغمبر عليه الصلاة والسلامدن صوڭره ايكنجى اولديغنه و أڭ أوّل يرينه گچه‌جگنه و ”صدّيق“ إسمى، اُمّتجه اوڭا عنوانِ مخصوص و صدّيقينلرڭ باشنده گورونه‌جگنه إشارت ايتديگى گبى؛ {وَالشُّهَدَاءِ} كلمه‌سيله حضرتِ عُمَر، حضرتِ عثمان، حضرتِ على رضوان اﷲِ عليهم أجمعينى اوچنى برابر إفاده ايدييور. هم اوچى صدّيقدن صوڭره نبوّتڭ خلافتنه مظهر اولاجقلرينى و اوچى ده شهيد اولاجقلرينى، فضيلتِ شهادتلرى ده سائر فضائللرينه علاوه ايديله‌جگنى إشارت و غيبى بر صورتده إفاده ايدييور. {وَالصَّالِحِينَ} كلمه‌سيله أصحابِ صفّه، بدر، رضوان گبى ممتاز ذواته إشارت ايده‌رك {وَ حَسُنَ اُولٰئِكَ رَفِيقًا} جمله‌سيله معناىِ صريحيله اونلرڭ إتّباعنه تشويق و تابعينلرده‌كى تبعيتى چوق مشرّف و گوزل گوسترمكله، معناىِ إشاريسيله خلفاءِ أربعه‌نڭ بشنجيسى اولارق و {اِنَّ الْخِلاَفَةَ بَعْدِى ثَلاَثُونَ سَنَةً} حديثِ شريفڭ حكمنى تصديق ايتديرن مدّتِ خلافتى آزلغيله برابر قيمتنى عظيم گوسترمك ايچون او معناىِ إشاريسيله حضرتِ حسن رضى اﷲ عنهى گوسترر