ناصلكه شو آيت، معناىِ صريحى ايله نوعِ بشرده نعمِ عاليۀِ إلٰهيه‌يه مظهر اولان أهلِ صراطِ مستقيم اولان قافلۀِ أنبيا و طائفۀِ صدّيقين و جماعتِ شهدا و أنواعِ صالحين و صنفِ تابعين؛ ”محسنين“ اولديغنى إفاده ايتديگى گبى، عالمِ إسلامده دخى او طائفه‌لرڭ أڭ أكملى و أڭ أفضلى بولونديغنى و نبىِّ آخر زمانڭ سرِّ وراثتِ نبوّتدن تسلسل ايدن طائفۀِ ورثۀِ أنبيا و صدّيقِ أكبرڭ معدنِ صدّيقيتندن تسلسل ايدن قافلۀِ صدّيقين و خلفاىِ ثلاثه‌نڭ شهادت مرتبه‌سيله مربوط بولونان قافلۀِ شهدا، {وَ الَّذِينَ اٰمَنُوا وَ عَمِلُوا الصَّالِحَاتِ} سرّيله باغلانان جماعتِ صالحين و {اِنْ كُنْتُمْ تُحِبُّونَ اﷲَ فَاتَّبِعُونِى يُحْبِبْكُمُ اﷲُ} سرّينى إمتثال ايدن و صحابه‌لرڭ و خلفاىِ راشدينڭ رفاقتنده گيدن أصنافِ تابعينى إخبارِ غيبى نوعندن گوسترديگى گبى، {وَالصِّدِّيقِينَ} كلمه‌سيله معناىِ إشارى جهتنده رسولِ أكرم عليه الصلاة والسلامدن صوڭره مقامنه گچه‌جك و خليفه‌سى اولاجق و اُمّتجه ”صدّيق“ عنوانيله شهرت بولاجق و صدّيقين قافله‌سنڭ رئيسى اولاجق حضرتِ أبو بكر الصدّيقى إخبار ايدييور. {وَالشُّهَدَاءِ} كلمه‌سيله خلفاىِ راشديندن اوچينڭ شهادتنى خبر ويرييور و صدّيقدن صوڭره اوچ شهيد، خليفه اولاجقلر. چونكه ”شهداء“ جمعدر. جمعڭ أقلّى اوچدر. ديمك حضرتِ عُمَر، حضرتِ عثمان، حضرتِ على (رضى اﷲ عنهم) صدّيقدن صوڭره رياستِ إسلاميته گچه‌جكلر و شهيد اولاجقلر. عين خبرِ غيبى وقوع بولمشدر. هم {وَالصَّالِحِينَ} قيديله أهلِ صفّه گبى طاعت و عبادتده توراتڭ ثناسنه مظهر اولمش أهلِ صلاحت و تقوا و عبادت، إستقبالده كثرتله بولونه‌جغنى إخبار ايتمكله برابر، {وَ حَسُنَ اُولٰئِكَ رَفِيقًا} جمله‌سى؛ صحابه‌يه، علم و عملده رفاقت و تبعيت ايدن تابعينلرڭ تبعيتنى تحسين ايتمكله، أبد يولنده او درت قافله‌نڭ رفاقتلرينى حسن و گوزل گوسترمكله برابر؛ حضرتِ حسنڭ (ر‌ض) بر قاچ آى گبى قيصه‌جق مدّتِ خلافتى، چندان آز ايدى. فقط {اِنَّ الْخِلاَفَةَ بَعْدِى ثَلاَثُونَ سَنَةً} حكميله و او إخبارِ غيبيۀِ نبويه‌نڭ تصديقى ايله و {اِنَّ ابْنِى حَسَنٌ هٰذَا سَيِّدٌ سَيُصْلِحُ اﷲُ بِهِ بَيْنَ فِئَتَيْنِ عَظِيمَتَيْنِ} حديثنده‌كى معجزانه إخبارِ غيبئِ نبوى‌يى تصديق ايدن؛ و ايكى بيوك اوردو، ايكى جماعتِ عظيمۀِ إسلاميه‌نڭ مصالحه‌سنى تأمين ايدن و نزاعى اورته‌لرندن قالديران حضرتِ حسنڭ (ر‌ض) قيصه‌جق مدّتِ خلافتنى أهمّيتلى گوستروب، خلفاءِ أربعه‌يه بر بشنجى خليفه گوسترمك ايچون، إخبارِ غيبى نوعندن معناىِ إشاريسيله و {وَ حَسُنَ اُولٰئِكَ رَفِيقًا} كلمه‌سنده بشنجى خليفه‌نڭ إسمنه علمِ بلاغتده ”مُسْتَتْبَعَاتُ التَّرَاكِيب“ تعبير ايديلن بر سرّ ايله إشارت ايدييور