قرآنِ حكيمڭ توافق جهتندن تظاهر ايدن إعجازى نكته‌لرندن بر نكته‌سى شودر كه: قرآنِ حكيمده إسم اﷲ، رحمٰن، رحيم، ربّ و إسمِ جلال يرنده‌كى هُوَنڭ مجموعى، درت بيڭ كسوردر. {بِسْمِ اﷲِ الرَّحْمٰنِ الرَّحِيمِ} (حسابِ أبجدڭ ايكنجى نوعى كه، حروفِ هجا ترتيبيله‌در) او ده درت بيڭ كسور ايدر. بيوك عددلرده كوچك كسرلر، توافقى بوزماديغندن كوچك كسرلردن قطعِ نظر ايديلدى.

هم {الم} تضمّن ايتديگى ايكى واوِ عطف ايله برابر ايكى يوز سكسان كسور ايدر. عينًا سورۀِ البقره‌نڭ ايكى يوز سكسان كسور إسمِ جلالنه و هم ايكى يوز سكسان كسور آياتڭ عددينه توافق ايتمكله برابر، أبجدڭ هجائى طرزنده‌كى ايكنجى حسابيله، ينه درت بيڭ كسور ايدر. او ده يوقاريده ذكرى گچمش بش أسماءِ مشهوره‌نڭ عددينه توافق ايتمكله برابر {بِسْمِ اﷲِ الرَّحْمٰنِ الرَّحِيمِ}ڭ كسرلرندن قطعِ نظر، عددينه توافق ايدييور.

ديمك بو سرِّ توافقه بناءً {الم} هم مسمّاسنى تضمّن ايدن بر إسمدر، هم البقره‌يه إسم، هم قرآنه إسم، هم ايكيسنه مختصر بر فهرسته، هم ايكيسنڭ أنموذجى و خلاصه‌سى و چكردگى، هم {بِسْمِ اﷲِ الرَّحْمٰنِ الرَّحِيمِ}ڭ مجمليدر.

أبجدڭ مشهور حسابيله {بِسْمِ اﷲِ الرَّحْمٰنِ الرَّحِيمِ} إسمِ ربّ عددينه مساوى اولمقله برابر، {الرَّحْمٰنِ الرَّحِيمِ} ده‌كى مشدّد (ر) ايكى (ر) صاييلسه؛ او وقت طوقوز يوز طقسان اولوب، پك چوق أسرارِ مهمّه‌يه مدار اولوب، اون طوقوز حرفيله اون طوقوز بيڭ عالمڭ مفتاحيدر