لمعه‌لر | اون اوچنجى لمعه | 204
(178-208)

اون اوچنجى إشارت: ”اوچ نقطه“در.


برنجى نقطه: شيطانڭ أڭ بيوك بر دسيسه‌سى: حقائقِ ايمانيه‌نڭ عظمتى جهتنده طار قلبلى و قيصه عقللى و قاصر فكرلى إنسانلرى آلداتير، دير كه: ”بر تك ذات، عموم ذرّات و سيّارات و نجومى و سائر موجوداتى بتون أحواليله تدبيرِ ربوبيتنده چويرييور، إداره ايدييور دينيلييور. بويله حدسز عجيب بيوك مسئله‌يه ناصل اينانيله‌بيلير؟ ناصل قلبه يرلشير؟ ناصل فكر قبول ايده‌بيلير؟“ دير. عجزِ إنسانى نقطه‌سنده بر حسِّ إنكارى اويانديرييور.


الجواب: شيطانڭ بو دسيسه‌سنى صوصديران سرّ: ”اﷲ أكبر“در. و جوابِ حقيقيسى ده ”اﷲ أكبر“در. أوت ”اﷲ أكبر“ڭ زياده كثرتله شعائرِ إسلاميه‌ده تكرارى، بو دسيسه‌يى محو ايتمك ايچوندر. چونكه إنسانڭ عاجز قوّتى و ضعيف قدرتى و طار فكرى، بويله حدسز بيوك حقيقتلرى ”اﷲ أكبر“ نوريله گوروب تصديق ايدييور و ”اﷲ أكبر“ قوّتيله او حقيقتلرى طاشييور و ”اﷲ أكبر“ دائره‌سنده يرلشديرييور و وسوسه‌يه دوشن قلبنه دييور كه: بو كائناتڭ غايت منتظمجه تدبير و تدويرى بِالمشاهده گورونويور. بونده ايكى يول وار:


برنجى يول: ممكندر، فقط غايت عظيمدر و خارقه‌در. ذاتًا بويله خارقه بر أثر، بر خارقه صنعت ايله، چوق عجيب بر يول ايله اولور. او يول ايسه: موجودات بلكه ذرّات عددنجه وجودينڭ شاهدلرى بولونان بر ذاتِ أحد و صمدڭ ربوبيتيله و إراده و قدرتيله اولماسيدر.

سس يوق

لمعه‌لر