قالدى ايكنجى مسئله: رونتگن شعاعيله رحمِ مادرده‌كى چوجغڭ أركك و ديشيسنى بيلمك ايله {وَ يَعْلَمُ مَا فِى اْلاَرْحَامِ} آيتنڭ مئالِ غيبيسنه منافى اولاماز. چونكه آيت يالڭز ذكورت و اُنوثت كيفيتنه دگل، بلكه او چوجغڭ عجيب إستعدادِ خصوصيسى و إستقبالده كسب ايده‌جگى وضعيتنه مدار اولان مقدّراتِ حياتيه‌سنڭ مباديلرى، حتّى سيماسنده‌كى غايت عجيب اولان سكّۀِ صمديت مراددر كه، چوجغڭ او طرزده بيلينمسى، علمِ علاّم الغيوبه مخصوصدر. يوز بيڭ رونتگن‌مثال فكرِ بشرى برلشسه، ينه او چوجغڭ عموم أفرادِ بشريه‌يه قارشى برر علامتِ فارقه‌سى بولونان يالڭز حقيقى سيماىِ وجهيه‌سنى كشف ايده‌مز. نره‌ده قالدى كه سيماىِ وجهى سكّه‌سندن يوز دفعه داها خارقه اولان إستعدادنده‌كى سيماىِ معنوى‌يى كشف ايده‌بيلسين.

باشده ديدك كه: وجود و حيات و رحمت، بو كائناتده أڭ مهمّ حقيقتلردر و أڭ مهمّ مقام اونلرڭدر. ايشته اونڭ ايچون او جامع حقيقتِ حياتيه، بتون اينجه‌لكلريله و دقائقيله إرادۀِ خاصّه‌يه و رحمتِ خاصّه‌يه و مشيئتِ خاصّه‌يه باقمالرينڭ بر سرّى شودر كه: حيات، بتون جهازاتيله و جهاتيله شكر و عبوديت و تسبيحڭ منشأ و مدارى اولديغندندر كه، إرادۀِ خاصّه‌يه حجاب اولان يكنسقلق و قاعده‌لك و رحمتِ خاصّه‌يه پرده اولان وسائطِ ظاهريه قونولمامشدر.

جنابِ حقّڭ رحمِ مادرده‌كى چوجقلرڭ سيماىِ مادّى و معنويلرنده ايكى جلوه‌سى وار:

بريسى: وحدتنى و أحديتنى و صمديتنى گوسترر كه، او چوجق أعضاىِ أساسيده و جهازاتِ إنسانيه‌نڭ أنواعنده سائر إنسانلرله موافق و مطابق اولديغى جهتله، خالق و صانعنڭ وحدتنه شهادت ايدييور. او جَنين بو لسان ايله باغيرييور كه: ”بڭا بو سيما و أعضايى ويرن كيم ايسه، بتون أساساتِ أعضاده بڭا بڭزه‌ين بتون إنسانلرڭ صانعى دخى اودر. و هم بتون ذى‌حياتڭ صانعى اودر