بشنجى دليل: طوقوز سنه‌در، بر كويده إختيارى اولارق إنزوايى إختيار ايتديگم و حياتِ إجتماعيه‌دن و سياسيه‌دن صيريلمق ايستديگم و بو دفعه گبى متعدّد باشمه گلن بتون إشكنجه‌لره تحمّل ايدوب، دنيا سياستنه قاريشمه‌مق ايچون بو اون سنه‌ده هيچ بر مراجعت ايتمديگمدر. أگر مراجعت ايتسه ايدم، أمثالم گبى بارلا يرينه إستانبولده اوطوره‌بيليردم. بلكه بو دفعه‌كى غدّارانه توقيفمڭ سببى؛ مراجعتسزلقدن كوسن و غرورلرينه طوقونان إسپارطه واليسنڭ و او حكومتڭ بعض مأمورلرينڭ غرضلرندن ويا إقتدارسزلقلرندن حبّه‌يى قبّه ياپوب، داخليه وكالتنى أوهاملانديرماسيدر.

الحاصل: بنم ايله تماس ايدن بتون دوستلرم بيليرلر كه؛ سياسته دگل قاريشمق، دگل تشبّث، بلكه دوشونمسى دخى أساس مقصديمه و أحوالِ روحيه‌مه و خدمتِ قدسيۀِ ايمانيه‌مه مخالفدر و اولامييور. بڭا نور ويريلمش، سياست طوپوزى ويريلمه‌مش. بو حالڭ بر حكمتى شودر: حقائقِ ايمانيه‌يه جدًّا مشتاق و مأموريت مسلگنه گيرن پك چوق ذاتلرى، او حقائقه أنديشه‌لى و تنقيدكارانه باقديرمامق و اونلردن محروم ايتمه‌مك ايچون، جنابِ حق سياسته قارشى قلبمه شدّتلى قاچنمق و بر نفرت ويرمشدر قناعتنده‌يم.

بنم مدارِ إتهامم اولان ايكنجى مادّه: معجزاتِ أحمديه (ع‌ص‌م) رساله‌سنڭ و بقاءِ روح و حشرِ أعظم رساله‌سنڭ آخرلرنده گورولن إمضالردر. گويا اونلر بر جمعيتڭ أفرادى ويا بر طريقتڭ درويشلريدر.

الجواب: بتون قوّتمله سزى تأمين ايدرم كه، او إمضا صاحبلرينڭ بو ايشده خطالرى يوقدر. خطا وارسه بنمدر. عجبا معجزاتِ أحمديه بحثنڭ گوز ايله گورولن بر كرامتنى گوزل گوروب و يگرمى طوقوزنجى سوز ألفلرينڭ خارقه توافقاتنى، حقّانيتنه بر إمضاىِ غيبى بيلوب بر خاطره اولارق إمضا ايدن و يانمه نادر گله‌بيلن بر مسافرڭ خطاسى وار مى؟ مسافرخانه صاحبلرينڭ خاطره دفترلرنده بو چشيد إمضالره و بقّاللرڭ دفترلرنده‌كى إسملره جمعيت نامى ويريلير مى؟ و بويله هركسڭ ألنه گچه‌بيلن و لوحه گبى بارلاده‌كى اوطه‌مده اوچ درت سنه تعليق ايديلن او إمضالر، بر جمعيتِ خفيه‌نڭ أفرادى اولماسنى هيچ عقل قبول ايدر مى؟ او إمضا صاحبلرينڭ چوغى مسافر ايديلر و بر قسمى ده سياستله علاقه‌سى اولميان بعض آخرت قارداشلرمدر. بزى يعنى بو إمضا صاحبلرينى چوق صيقمايڭز. چونكه إسپارطه‌ده إستنطاق دائره‌سنده غايت ناموسلى مستقيم بر قارداشمز اولان متقاعد بيڭباشى مرحوم عاصم بك إستجواب ايديلدى؛ أگر طوغرى ديسه، استادينه ضرر گلير و أگر يالان ديسه، قرق سنه‌لك ناموسكارانه و مستقيمانه عسكرلك حيثيتنه چوق آغير گلير دييه دوشونوب، ”يا ربّ، حياتمى آل!“ ديمش. دعاسى قبول اولوب او دقيقه‌ده تسليمِ روح أيلدى. إستقامت شهيدى اولدى. و دنياده هيچ بر قانونڭ خطا دييه‌ميه‌جگى بر معاونتِ خيريه و بر تصديقه خطا توهّم ايدنلرڭ چركين خطالرينه قربان اولدى. أوت رسالۀِ نوردن تام درس آلان، بر صو ايچر گبى قولايجه ترخيص تذكره‌سى تلقّى ايتديگى أجل شربتنى ايچر. أگر بندن صوڭره دنياده قالان قارداشلريمڭ تألّملرينى دوشونمسه ايدم، بن ده عالى‌جناب قارداشم عاصم گبى ”يا ربّ! جانمى ده آل“ دييه دعا ايده‌جكدم. هر نه ايسه