ثالثًا: بنم گبى جدّى بر محبّتله تورك ملّتنى سَون و قرآنڭ ثناسنه مظهريتلرى جهتيله تورك ملّتنى پك چوق تقدير ايدن و آلتى يوز سنه‌دن بَرى بتون دنيايه قارشى قويان و قرآنڭ بايراقدارى اولان بو ملّته قارشى غايت شدّتلى طرفدار بولونان و بيڭ توركڭ شهادتيله، بيڭ ملّيتجى توركجيلر قدر تورك ملّتنه بِالفعل خدمت ايدن و قيمتدار اوتوز قرق تورك گنجلرينى، نمازسز اوتوز بيڭ همشهريلرينه ترجيح ايتمكله بو غربتى إختيار ايدن و خواجه‌لق حيثيتيله عزّتِ علميه‌يى محافظه ايدن و حقائقِ ايمانيه‌يى پك واضح بر صورتده درس ويرن بر إنسانڭ؛ اون سنه و بلكه يگرمى اوتوز سنه ظرفنده، يگرمى اوتوز دگل، بلكه يوز و بيڭ طلبه‌سى، صِرف ايمان و حقيقت و آخرت نقطه‌سنده اونڭله فداكارانه باغلانسه و آخرت قارداشى اولسه چوق ميدر و ضررى مى وار؟ هيچ أهلِ وجدان و إنصاف بونلرى تنقيده جواز ويرر مى؟ و بونلره جمعيتِ سياسيه نظريله باقه‌بيلير مى؟

رابعًا: اون سنه ظرفنده يوز بانقنوط ايله إداره ايدن و بعضًا گونده قرق پاره ايله گچينن و يتمش يامالى بر عبايى يدى سنه گيه‌ن بر آدم حقّنده: ”نره‌دن پاره آلوب ياشايورسڭ و تشكيلات ياپييورسڭ؟“ ديينلرڭ نه قدر إنصافدن اوزاق دوشدكلرينى أهلِ إنصاف آڭلار.

ايكنجى مادّه: منمن حادثه‌سنڭ بر يالانجى تقليدينى ياپوب؛ ملّته دهشت ويروب، سربستى قانونلرى قولايجه تطبيق ايتمك دسيسه‌سيله، حكومتى إغفال ايده‌رك، گويا ”حكومتڭ سربستى قانونلرينى قبول ايتديرمسنه يارديم ايدييور“ أنتريقه‌سيله، بنى بارلادن إسپارطه‌يه جبرًا جلب ايتديلر. باقديلر، بن اويله فتنه‌لره آلَت اولامييورم و اويله هر جهتجه وطنه، ملّته، دينه ضررلى اولان عقيم تشبّثلره بر مَيلم يوقدر، آڭلاديلر، او وقت پلانلرينى دگيشديرديلر. بنم بگنمديگم بر شهرتِ كاذبه‌مدن إستفاده ايدوب، هيچ خاطر و خيالمزه گلمه‌ين أنتريقه‌لر ايله باشمزه منمن حادثۀِ مظلومه‌سنڭ بر موهوم تقليدينى گچيرديلر. هم ملّته، هم حكومته، هم معصوم، موقوف بر چوق أفرادِ ملّته بيوك ضررلر ويرديلر. شيمدى يالانلرى ميدانه چيقدقجه، قوردڭ كچى‌يه بهانه بولماسى نوعندن بهانه‌لر بولوب، مأمورينِ عدليه‌يى شاشيرتمق ايسته‌يورلر. عدليه مأمورلرى بو مسئله‌مزده چوق دقّته و إحتياطه محتاج اولدقلرينى، مدافعۀِ حقوقم نقطه‌سندن خاطرلاتييورم. أصل إتهام ايديله‌جك اونلردر كه، حكومتڭ بعض أركاننه دالقاووقلق ايدوب و ساخته‌كارلقله، بر يالانجى جمعيت ماسكه‌سى آلتنده بعض صافدل معصوم بيچاره‌لرى تهييج ايده‌رك كوچك بر حادثه چيقارير؛ صوڭره شيطان گبى حبّه‌يى قبّه گوستروب، حكومتى شاشيرتير، چوق معصوملرى أزديرر، مملكته بيوك بر ضرر ويرر، قباحتى ده باشقه‌لره يوكلر. ايشته بو مسئله‌مز ده عينًا بويله‌در