نه ايله ياشايورسڭ؟

الجواب: طوقوز سنه إقامت ايتديگم بارلا خلقنڭ مشاهده‌سيله، شدّتِ إقتصاد بركتيله و تام قناعت خزينه‌سيله. و أكثر گونلرده هر بر گون قرق پاره ايله، بعض داها آز بر مصرفله ياشاديغمى، بنمله تماس ايدن دوستلرم بيليرلر. حتّى يدى سنه ظرفنده؛ ألبسه، پاپوچ گبى شيلره يدى بانقنوط ايله إداره ايتدم

هم ألڭزده بولونان تاريخچۀِ حياتمڭ شهادتيله، بتون حياتمده خلقلرڭ هديه و صدقه‌لرندن إستنكاف ايدوب، أڭ صادق دوستلريمڭ خاطرلرينى رنجيده ايده‌رك هديه‌سنى ردّ ايتمشم. أگر مجبوريتله هديه آلمش ايسه‌م، مقابلنى ويرمك شرطيله آلديغمى، بڭا خدمت ايدن دوستلرم بيليرلر. دار الحكمة الإسلاميه‌ده آلديغم معاشدن چوغنى، او زمان يازديغم كتابلرڭ طبعنه صرف ايتدم؛ آز بر قسمنى، حجّه گيتمك ايچون صاقلادم. ايشته او جزئى پاره، إقتصاد و قناعت بركتيله اون سنه بڭا كافى گلدى و يوز صويومى دوكديرمدى؛ داها او مبارك پاره‌دن برآز وار.

أى هيئتِ حاكمه! بو اوزون إفاداتمى ديڭله‌مكدن اوصانمه‌مق گركدر. چونكه اوتوز قرق كتابم، بنم توقيفنامه‌مڭ أوراقى ايچنه گيرمشلر. بو قدر إتهام أوراقمه قارشى، ألبته اوزون اولان بو إفاده پك قيصه قالير. بن اون اوچ سنه‌در دنيا سياستنه قاريشمديغمدن، قانونلرى بيلمييورم. هم كنديمى مدافعه ايتمك ايچون، آلداتمغه تنزّل ايتمديگمه تاريخچۀِ حياتم شاهددر. بن، حقيقتِ حالى اولديغى گبى بيان ايتدم. سزڭ وجدانڭز وار و قانونلرڭ غدرسز وجهِ تطبيقلرينى بيليرسڭز، حقّمده حكمڭزى ويررسڭز

بونى ده بيليڭز كه: بعض إقتدارسز مأمورلرڭ يا إقتدارسزلقلرندن ويا أوهاملرندن ويا كچى قورد بهانه‌سى نوعندن ويا كنديلرينه بر پايه ويرمك ويا حكومته يارانمق فكريله، يڭى سربستى قانونلرينڭ تطبيقلرينه زمين حاضرلامق أنتريقه‌لرندن، حقّمده دوربين ايله باقه‌رق حبّه‌يى قبّه گوسترديلر. بيڭلر ليرا بزلره ضرر ويرديلر. سزلردن اميديمز بودر كه؛ إقتداريڭزدن، اونلرڭ أوهاملرينڭ قبّه‌سنى حبّه اولديغنى گوسترمكدر. يعنى دوربينلرينى عكسنه چويروب باقه‌سڭز