أوت دگل بو محكمه‌يه، بلكه بتون دنيايه إعلان ايدييورم: بن حقائقِ قدسيۀِ ايمانيه‌يى، آوروپا فيلسوفلرينه و بِالخاصّه دينسز فيلسوفلره و بِالخاصّه سياستى دينسزلگه آلَت ايدنلره و آسايشى معنًا إخلال ايدنلره قارشى مدافعه ايتمشم و ايدييورم.

بن حكومتِ جمهوريه‌يى، إلجاآتِ زمانه گوره بر قسم قانونِ مدنى‌يى قبول ايتمش و وطن و ملّته ضرر ويرن دينسزلك جريانلرينه ميدان ويرمه‌ين بر حكومتِ إسلاميه بيلييورم. قرارنامه نامنده‌كى إتهامنامه‌ده، وظيفه‌سنى ياپان مستنطقلره دگل، بلكه مستنطقلرڭ إستناد ايتديگى ملحد ظالملرڭ أوهام و أنتريقه‌لرينه قارشى ديرم:

سز بنى ”دينى سياسته آلَت ايتمك“ ايله إتهام ايدييورسڭز. و او إتهامڭ ظاهر بر إفترا اولديغنى و أساسسز، چوروك بولونديغنى يوز دليلِ قطعى ايله إثبات ايتمكله برابر؛ بو آغير إفتراڭزه مقابل، بن ده سزى، سياستى دينسزلگه آلَت ايتمك ايسته‌يورسڭز دييه إتهام ايدييورم!

ايكنجى عمده: نظرِ تنقيد ايله، بر جربزه ايله، بيڭلر محاسن ايچنده نظرلرنده خطيئات توهّم ايديلن اونبش يگرمى نقطه ايله، بتون او محاسنى ستر ايتديره‌جك و حكمدن إسقاط ايده‌جك و يالڭز او اونبش يگرمى نقطه اوڭا هدفِ مقصود اولديغنى إتهامكارانه ايلرى سورن غرضكار مخبرلرڭ و وهّاملرڭ ماهيتنى بو حكايه ايله ايضاح ايدييورم:

بر زمان جربزه‌لى بر پادشاه، عدالت نيّتيله چوق ظلم ايدييورمش. بر محقّق عالم اوڭا ديمش: ”أى حاكمِ عدالت‌پرور! سن رعيتڭه عدالت ناميله ظلم ايدييورسڭ. چونكه تنقيدكارانه جربزه‌لى نظرڭ، زمانًا متفرّق قصوراتى بردن طوپلار؛ بر زمانده تصوّر ايدوب، صاحبنى شدّتله بر جزايه چارپييورسڭ. هم بر قَومڭ متفرّق أفرادنده وجوده گلن قصوراتى، تنقيدكار جربزه‌لى نظرڭله طوپلارسڭ. صوڭره او پرده ايله، او طائفه‌نڭ هر فردينه قارشى بر نفرت، بر حدّت سزه گلير؛ حقسز اولارق اونلرى وورورسڭ. أوت سنڭ بر سنه ظرفنده آتديغڭ توكروك، بر گونده سندن چيقمش بولونسه، ايچنده بوغولاجقسڭ. متفرّق زمانده إستعمال ايتديگڭ صولْفاتو گبى آجى علاجلرى، بردن بر گونده بر قاچ كيشى إستعمال ايتسه، هپسنى ده ئولديره‌بيلير.“ ايشته عين بونڭ گبى؛ محاسنڭ اورته‌لرنده بولونماسيله، آرا صيره وقوع بولان قصوراتى ستر ايتمك لازم گليركن؛ سن رعيتڭه قارشى قصوراتى إزاله ايدن محاسنى دوشونمه‌دن، جربزه‌لى نظرڭله متفرّق قصوراتى طوپلايوب، آغير جزالر ويرييورسڭ. ايشته او پادشاه، او محقّق عالمڭ ايقاظاتيله، عدالت نامنه ياپديغى ظلمدن قورتولدى.