ديدى: ”يالڭز إشارت دگل، بلكه جلجلوتيه‌مده تصريح ايدييورم.“

بن بو جوابدن صوڭره، قصائدِ عَلَويه‌‌دن أڭ مشهور و أڭ زياده أسرارلى اولان جلجلوتيه قصيده‌سنده بو فقره‌يى گوردم:

تُقَادُ سِرَاجُ النُّورِ سِرًّا بَيَانَةً ❊ تُقَادُ سِرَاجُ السُّرْجِ سِرًّا تَنَوَّرَتْ

دقّت ايتدم، صراحت درجه‌سنده رسالۀِ نوره باقار. أزجمله: سراج النور بر تك فرق ايله تام و عينًا رسالۀِ نوردر. چونكه سراج النورده ألف لام، جيم ايله برابر اوتوز درت ايدر. رساله‌ده ”ل“ و ”هـ“ اوتوز بش ايدر كه، بر تك فرق وار. او تك فرق ألفدر، او ده بيڭه إشارت ايدر.

هم برنجى فقره جفر و أبجد حسابيله (شدّه صاييلماز) بيڭ اوچيوز أللى ايكى (١٣٥٢) ويا أللى (١٣٥٠) ايدر كه؛ بو تاريخ، رسالۀِ نورڭ گيزلنمه‌سنه و گيزلى پارلاماسنه و إشتعالنه تام توافق ايدر. أگر {بَيَانَةً} كلمه‌سى صاييلمازسه (حاشيه) او وقت {سِرًّا} كلمه‌سنڭ آخرنده‌كى تنوين (نون) صاييلير، بيڭ اوچيوز اوتوز اوچ (١٣٣٣) ويا اوتوز بش (١٣٣٥) اولور كه؛ بو تاريخ، رسالۀِ نورڭ مبدأِ إنتشاريدر.

ايكنجى فقره اولان {تُقَادُ سِرَاجُ السُّرْجِ سِرًّا}

{سِرَاجُ السُّرْجِ} ينه اون فرقله رسالۀِ نوره و فرقسز رسالۀِ نورى توافق ايتمكله برابر، تمام فقره جفر و أبجد حسابيله (شدّه صاييلماز) بيڭ ايكى يوز طقسان اوچ (١٢٩٣) ايدر كه؛ رسالۀِ نور مؤلّفنڭ تاريخِ ولادتيدر. و {سِرًّا} ده‌كى تنوين (نون) اولسه بيڭ اوچيوز قرق اوچ (١٣٤٣) اولور كه؛ رسالۀِ نوردن اوننجى سوزڭ إنتشارى ايله پارلاماسى زمانيدر. أگر {اَلسُّرْجِ} ده‌كى شدّه‌لى ”س“ ايكى ”س“ صاييلسه و تنوين (نون) صاييلمازسه بيڭ اوچيوز أللى اوچ (١٣٥٣) ايدر كه؛ بو تاريخ، رسالۀِ نورڭ بر مصيبت نتيجه‌سنده موقّت گيزلنمه‌سنه و گيزلى پرده آلتنده پارلاماسنه و تنويرينه تام توافق ايدر.

-----------------------------------------------------------------------

(حاشيه : {بَيَانَةً} كلمه‌سنده‌كى (ة) وقفه راست گلديگندن (هـ) اولور