هم باشده سورۀِ إخلاص ايله إشارت ايديلن وَفقِ مُثَلّث بيڭ اوچيوز أللى بر (١٣٥١) ايدر. هم بو إشارتِ عَلويه‌يه بو ده ايما ايدر كه؛ او قصيده‌نڭ نصفِ أوّلنده يتمش فقره‌ده اون يدى دفعه نور (حاشيه) كلمه‌سنى تكرار ايدييور و متعدّد دفعه سريانيجه بديع معناسنده اولان جلجلوتيه كلمه‌سنى اويله أهمّيتله ذكر ايدر كه؛ قصيده‌نڭ إسمى جلجلوتيه اولمشدر. رسالۀِ نور أسماءِ حسنى ايچنده إسمِ نور، إسمِ حكيم و إسمِ بديعڭ مظهريدر. ظاهرنده، طرزِ بياننده إسمِ بديعڭ جلوه‌سى گورونويور

هم {تُقَادُ سِرَاجُ النُّورِ} فقره‌سندن ايكى سطر أوّل بو فقرۀِ رعنا، بلكه أڭ أهمّيتلى و أڭ پارلاق فقره اولان {اَقِدْ كَوْكَبِى بِاْلاِسْمِ نُورًا وَ بَهْجَةً ❊ مَدَى الدَّهْرِ وَ اْلاَيَّامِ يَا نُورُ جَلْجَلَتْ} يعنى: يا ربّ! بنم ييلديزيمى نور ايله آخر زمانه قدر بديع بر صورتده ايشيقلاندير، شعله‌لندير

أوت إمامِ على رضى اﷲ عنهڭ شو دعاسى، بو زمانده رسالۀِ نور ايله قبول اولديغنى و رسالۀِ نورى إراده ايتديگنى شو بديع، عجيب توافقات إثبات ايدر. شويله كه

{اَقِدْ كَوْكَبِى بِاْلاِسْمِ نُورًا} تام تامنه عينًا جفر و أبجد حسابيله رسالۀِ نور اولويور. چونكه نور كلمه‌سى هر ايكيسنده ده وار. {اَقِدْ كَوْكَبِى بِاْلاِسْمِ} ايكى يوز طقسان آلتى (٢٩٦) ايدر. رسالۀِ نورده‌كى ”رساله“ كلمه‌سى دخى عينًا ايكى يوز طقسان آلتى (٢٩٦) در. ديمك إمامِ على رضى اﷲ عنه بتون علومنڭ خزينه‌سى اولان قرآنِ معجز البيانڭ بر شعلۀِ إعجازى اولان رسالۀِ نورى جنابِ حقدن آخر زمانده قرآنه چليك بر سور و پارلاق بر ييلديز اولارق ايسته‌مش. (حاشيه*) و دعاسى قبول اولمش

---------------------------------------------------------

حاشيه: رسالۀِ نورڭ سببِ تسميه‌سى اون يدى جهتله نور ايله علاقه‌دار اولديغندن و اون عدددن زياده رسالۀِ قدرڭ مسائلِ متفرّقه‌سنڭ آخرنده ذكر ايديلمشدر. ألبته بو لطيف توافق معناسز اولاماز.
(حاشيه* : {تُقَادُ سِرَاجُ السُّرْجِ سِرًّا تَنَوَّرَتْ} دن صوڭره متّصل اولارق گلن شو سطر: {بِنُورِ جَلاَلٍ بَازِخٍ وَشَرَنْطَخٍ ❊ بِقُدُّوسِ بَرْكُوتٍ بِهِ النَّارُ اُخْمِدَتْ} ينه رسالۀِ نوره پك ظاهر بر صورتده باقار. چونكه معناسى شودر: رسالۀِ نور آخر زمانده پرده آلتنده گيزليجه تنوّر ايدوب، نورلى إسم {شَرَنْطَخٍ بِقُدُّوسِ بَرْكُوتٍ} يعنى رؤُف رحيمدن إسمِ أعظمڭ تأثيرى آلتنده جلال و كبريانڭ عظمتلى نورندن إقتباس ايده‌رك ضلالت و إلحاد آتشنى سوندوره‌جك. أوت بو معنا، رسالۀِ نوره تام تامنه مطابقدر. چونكه رسالۀِ نورى مطالعه ايدنلر بيليرلر كه؛ اونڭ ايكى منبعى وار. برى: إسمِ أعظمڭ كبريالى و عظمتلى جلوه‌سى. ديگرى: إسمِ رحيمڭ شفقتلى و رأفتلى تجلّيسيدر. و اونڭ نوريله فتنۀِ دينيه نارى و زندقه آتشى سونويور و سونه‌جك