{وَلاَ اَسَدٌ يَاْتِى اِلَيْكَ بِهَمْهَمَتْ} فقره‌سنڭ مخاطبى متعدّد أماره‌لرله ”يا كردى“در. چونكه حضرتِ إمامِ على (رض) قصيدۀِ أرجوزيه‌سنده {يَامُدْرِكًا لِذٰلِكَ الزَّمَانِ} فقره‌سنده لفظًا و معنًا كردى نامنى ويرييور. او حالده ”يا كردى“ده‌كى ”يا“ شدّه‌سز اولسه او وقت بيڭ اوچيوز يگرمى بر (١٣٢١) ايدر. او تاريخده او كردى، باشيت نامنده‌كى مشهور طاغڭ باشنده بر طاش اوستنده آقشام نمازينى قيلدقدن صوڭره يالڭز اولارق اوطوروركن، او طاغڭ أسَدى و آرسلانى حكمنده اولان بر جاناوار قورد ياننه گلدى. بر آرقداش گبى اوڭا ايليشمدى. أگر ”يا كردى“ ده‌كى ”يا“ شدّه‌لى اولسه او وقت بيڭ اوچيوز اوتوز بر (١٣٣١) ايدر كه، او تاريخده أرمنى، روس قوميته‌سنڭ جاناوارلرى هر طرفده او كردى‌يى صاردقلرى و قتلنه چاليشدقلرى و فقط موفّق اولامدقلرى تاريخه تام تامنه توافق ايدر

ايشته بيڭ اوچيوز اوتوز بر (١٣٣١) تاريخنه و او دهشتلى حربِ عمومينڭ شدّتلى زماننه و سعيدِ كردينڭ أڭ مصيبتلى و أڭ قورقولى زماننه حضرتِ إمامِ على (رض) بو آلتى سطرده آلتى دفعه {لاَ تَخْشَ‌ لاَ تَخْشَ‌ لاَ تَخْشَ‌} دييه مكرّرًا او تاريخه إشارت ايتمك، ألبته هيچ بر جهتله تصادف اولماز. و علمِ أسرار و جفرده علاّمۀِ اُمّت اولان حضرتِ على (رض) سرلى و كرامتلى اولان مشهور قصيدۀِ جلجلوتيه‌سنده إستقباله باقان آلتى سطرده آلتى دفعه مكرّرًا عين تاريخه و عين قورقولى وقتنه {لاَ تَخْشَ} كلمه‌سنده جفر حسابيله و معناسيله گوسترمسى شكسز، شبهه‌سز بر كرامتِ غيبيه‌سيدر. رسولِ أكرم عليه الصلاة والسلامدن آلمش، أمّته درس ويرمش