بو لمعه‌نڭ باشنده إمامِ على (ر‌ض)، رسالۀِ نوره إشارت ايتديگندن، بر قارداشمز هيجانلى بر إشتياقله رسالۀِ نوره، ألماس جوهر نور إسمنى طاقوب تكرار ايده‌رك يازمشدى. بو لمعه‌نڭ آخرنده درجى مناسب گورولدى

تقوا دائره‌سنده بولونان طلبه دلى ده اولسه، عجبا رسالۀِ نورڭ و قيمتلى ألماسڭ نورندن آيريله‌بيلير مى؟ اويله تخمين ايدرم كه: رسالۀِ نورڭ بو عاجز طلبه‌ڭز قدر كرامتنى، فضيلتنى، لذّتنى يين، طاتلى ميوه‌سندن قوپاران نادردر. هم بو قدر عاجزلگم ايله برابر، رسالۀِ نوره خدمت ايده‌مديگم حالده گوسترمش اولديغڭز توجّهه مديونِ شكرانم. بناءً عليه رسالۀِ نوردن بنده‌ڭز دگل، هيچ بر طلبه‌ڭز او مبارك ألماسدن و لذّتدن آيريلاماز

عفويڭزه مغرورًا رسالۀِ نورڭ بو دفعه‌كى تحرّياتنده ايكى كرامتى ميدانه عينًا چيقمشدر: حپسخانه ايچريسنده پوليس، ژاندارمه و غارديانلر مدهش آراما ياپاركن، او أثناده هيچ كيمسه گورمه‌دن، يدى سكز ياشنده، همشيره‌مڭ مخدومى، مكتب چانطه‌سنڭ ايچريسنه رسالۀِ نورڭ نسخه‌لرينى قويه‌رق آلوب گيتمشدر. آراما، بنده‌ڭزڭ اوطه‌سنده ايدى. چوجق اوطه‌يه گلدى، اوطه‌ده تلاش گورونجه، اوطه‌نڭ بر طرفنده آيريجه طوران رسالۀِ نورلرى چانطه‌سنه قويدى و ايچريده‌كى مأمورلرڭ هيچ بريسى فرقنه وارمادى، چوجغه ده بر شى ديمه‌ديلر. فداكار چوجق طوغريجه والده‌سنه گيدييور. ”داييمڭ دائما بزه اوقوديغى رسالۀِ نورلرى گتيردم. بونلرى آلاجقلرمش. بن اونلرڭ خبرى اولمادن، اونلر باشقه مكتوب، كتاب قاريشديررلركن آلدم، چانطه‌مه قويدم. بونلرى اييجه بر يره قوييڭز، محافظه ايديڭز. بن بونلرڭ اوقونماسنى چوق سَوييورم. داييم بزه بونلرى اوقويوردى. او اوقوركن بن باشقه بر حالت كسب ايدييوردم.“ دييه والده‌سنه سويله‌يور و مكتبنه عودت ايدييور. بو سايه‌ده ألماس جوهر نورلر أله گچمه‌مش اولويور. بو كرامت دگل ده نه‌در؟ قرآنى بر معجزه دگلدر ده نه‌در؟ عجبا بو فضيلت، عجبا بو لذّت، عجبا بو ألماس جوهر، هانگى تأليفاتده واردر كه، بو ألماس جوهر نورلر، شيمدى‌يه قدر هانگى ذاتڭ آغزندن دوكولمشدر؟ بن ده؛ حپس دگل، بو ألماس جوهر نورلر ايچون هر آن، هر دقيقه، هر فداكارلغى ممنونيتله قبول ايدرم. بندن صوڭره بو ألماس جوهر نورلر يولنه أولادم أمين ده بتون حياتنى صرف ايتمگه حاضردر