آلتى إسمِ أعظمڭ آلتى نكته‌لرينڭ {اَﷲُ اَحَدٌ}ه دائر
يدنجى نكتۀِ أعظميدر
بِسْمِ اﷲِ الرَّحْمٰنِ الرَّحِيمِ
وَ بِهِ نَسْتَعِينُ
{فَاعْلَمْ اَنَّهُ لاَ اِلٰهَ اِلاَّ اﷲُ} آيتنڭ بر محتشم نكته‌سيله، مشهور بر قَسَمِ نبوينڭ إشارتيله و إلهاميله حسّ ايتديگم غايت گوزل و چوق شيرين و نهايت درجه‌ده لطيف اوچ ميوۀِ توحيد و اوچ مقتضيسى و اوچ حجّتنه دائر بر نكته‌در.

ايشته رسولِ أكرم عليه الصلاة والسلام يمين ايتديگى وقت، أڭ چوق إستعمال و تكرار ايله هر زمان فرمان ايتديگى شو {وَالَّذِى نَفْسُ مُحَمَّدٍ بِيَدِهِ} قَسَميدر. و بو قَسَم گوسترييور كه، شجرۀِ كائناتڭ أڭ گنيش دائره‌سى و أڭ منتهاسى و نهاياتى و تفرّعاتى دخى ذاتِ واحدِ أحدڭ قدرتيله و إراده‌سيله‌در. چونكه مخلوقاتڭ أڭ منتخب و أڭ مستثناسى اولان محمّد عليه الصلاة والسلامڭ نفسى، كندى كندينه مالك اولمازسه و أفعالنده سربست بولونمازسه و حركاتى باشقه بر إختياره باغلى ايسه؛ ألبته هيچ بر شى، هيچ بر شأن، هيچ بر حال، هيچ بر كيفيت (جزئى اولسون كلّى اولسون) او محيط إقتدارڭ، او شامل إختيارڭ دائرۀِ تصرّفنڭ خارجنده اولاماز. أوت، بو چوق معنيدار قَسَمِ محمّدينڭ (ع‌ص‌م) إفاده ايتديگى غايت معظّم و محيط بر توحيدِ ربوبيتدر. و بو توحيدڭ إثباتنه دائر يوز بلكه بيڭ باهر برهانلر، سراج النور اولان رسالۀِ نورده بيان ايديلديگندن، بو حقيقتِ عاليه‌نڭ تفصيلات و إثباتنى اوڭا حواله ايده‌رك بو ايكنجى شعاعده مختصر اوچ مقام ايچنده بو چوق أهمّيتلى حقيقتِ ايمانيه‌نڭ برنجى مقامنده غايت لطيف و طاتلى و چوق قيمتدار و نورلى، حدسز ثمره‌لرندن اوچ كلّى ميوه‌لرينى غايت مختصر بر صورتده بيانله، او ميوه‌لره بنم قلبمى سَوق ايدن ذوقلريمه و حسلريمه إشارت ايديله‌جك. ايكنجى مقامده ايسه بو قدسى حقيقتڭ اوچ كلّى مقتضيسى و أسبابِ موجبه‌سى بيان ايديلير و او اوچ مقتضى اوچ بيڭ مقتضيلرڭ قوّتنده‌درلر. و اوچنجى مقامده، او حقيقتِ توحيديه‌نڭ اوچ علامتلرى ذكر ايديله‌جك و او اوچ علامت اوچ يوز علامت و أماره و دليل قوّتنده‌درلر