(معلوم اولسون كه؛ بن رسالۀِ نورڭ قيمتنى و أهمّيتنى بيان ايتمكله قرآنڭ حقيقتلرينى و ايمانڭ ركنلرينى إعلان ايتمك و ضعفِ ايمانه دوشنلرى اونلره دعوت ايتمك و اونلرڭ قوّتلرينى و حقّانيتلرينى گوسترمك ايسته‌يورم. يوقسه، حاشا كنديمى و هيچ بر جهتله بگنمديگم نفسِ أمّاره‌مى بگنديرمك و مدح ايتمك دگلدر. هم رسالۀِ نور ظاهرًا بنم أثرم اولمق حيثيتيله ثنا ايتمييورم. بلكه يالڭز قرآنڭ بر تفسيرى و قرآندن ملهم بر ترجمانِ حقيقيسى و ايمانڭ حجّتلرى و دلاّلى اولمق حيثيتيله مزيتلرينى بيان ايدييورم. حتّى بر قسم رساله‌لرى إختيارم خارجنده يازديغم گبى، رسالۀِ نورڭ أهمّيتنى ذكر ايتمكده إختيارسز حكمنده‌يم. إمامِ على‌نڭ (رضى اﷲ عنه) آيت الكبرا نامنى ويرديگى يدنجى شعاع رساله‌سنى يازمقده چوق زحمت چكديگمه بر مكافاتِ عاجله و بر علامتِ مقبوليت و بر مدارِ تشويق اولارق بو كرامتِ جلجلوتيه، عنايتِ إلٰهيه طرفندن ويريلديگنه شبهه‌م قالمامش. تحديثِ نعمت قبيلندن بونى سكزنجى شعاع اولارق يازدم. يوقسه حشره دائر مهمّ بر آيتڭ معجزه‌لى اولان برهانلرينى يازاجقدم.)