أوت اون سكزنجى و يگرمى سكزنجى لمعه‌لرده ايضاح و إثبات ايديلن ايكى ظاهر كرامتنى تأييد و تقويه ايده‌رك قصيدۀِ جلجلوتيه‌سنده سراج النوردن صراحت درجه‌سنده خبر ويرديگى گبى، ينه او قصيده‌ده سراج النورڭ أڭ نامدار رساله‌لرينه پارمق باصييور، عادتا آلقيشلايور؛ و سكز عدد رمز ايله مشهور بر قسم رساله‌لرينى گوسترييور

برنجيسى: رسالۀِ النوره تصريح ايدن {تُقَادُ سِرَاجُ النُّورِ سِرًّا بَيَانَةً} فقره‌سندن صوڭره سُريانى لسانيله أسماءِ حسنى‌دن إستمداد و سُوَرِ قرآنيه ايله بر مناجات ياپييور. تام اوتوز اوچ سوره‌لرله اويله غريب و معنيدار بر طرزده ذكر ايدييور كه؛ بر قسم سرلرى و غيبى خبرلرى دخى بيلديرمك ايستديگى آڭلاشيلييور. بن صيقنتيلى بر زمانده إمامِ على‌نڭ (رضى اﷲ عنه) آيت الكبرا نامنى ويرديگى يدنجى شعاعى بيتيرديگم عين وقتده (إعتقادمجه بڭا عجله بر مكافات و بر اجرت اولارق) گيجه‌لين جلجلوتيه‌يى اوقودم. بردن بر إخطارِ غيبى گبى قلبمه دينيلدى: إمامِ على رضى اﷲ عنه، رسالۀِ النور ايله چوق مشغولدر. مجموعندن خبر ويرديگى گبى قيمتدار رساله‌لرينه ده إشارت درجه‌سنده رمز ايدوب ايما ايدييور. أگر صريح بر صورتده غيبدن خبر ويرمك (چوق ضررلرى بولونديغندن، حكمته منافى اولديغى جهتله) حكمتِ إلٰهيه طرفندن ياساق اولماسه ايدى تصريح ايده‌جكدى. مثلا؛ سوره‌لرى تعداد ايدركن، يگرمى بشنجى‌يه گلديگى وقت دييور كه