ايشته بو فقره‌لرده أسكيشهر آغير جزا محكمه‌سنى حيرتده بيراقان و اوستنده گوز ايله گورونن بر كرامتيله و قيامت و حشرى إثبات ايدن خارقه حجّتلريله إشتهار ايدن يگرمى طوقوزنجى سوزه حضرتِ إمامِ على رضى اﷲ عنه، ذكر و تعداد ايتديگى سوره‌لرڭ يگرمى طوقوزنجى مرتبه‌سنده {وَالشَّمْسُ كُوِّرَتْ} ايله اوڭا إشارت ايدر. چونكه قيامت قوپماسندن غايت دهشتلى خبر ويرن {اِذَا الشَّمْسُ كُوِّرَتْ} سوره‌سنه تام مطابق بر صورتده او يگرمى طوقوزنجى سوز، قيامتڭ و خرابِ عالمڭ و موتِ دنيانڭ و حياتِ آخرتڭ و إحياىِ أمواتڭ قطعى حجّتلرينى بيان ايدركن، بو سوره‌نڭ دهشتلى تصويرينى ذكر ايتمسى؛ هم معناده، هم يگرمى طوقوزنجى مرتبه‌ده تطابقلرى او إشارتى إثبات ايدر

هم تحوّلاتِ ذرّاتده بوغولان مادّيونلرى صوصديران و ذرّاتڭ تحوّلاتى و حركاتنى، وظيفه و إنتظاملرينى أمثالسز بر طرزده إثبات ايدن اوتوزنجى سوز نامنده‌كى ذرّات رساله‌سنه حضرتِ إمامِ على رضى اﷲ عنه، اوتوزنجى مرتبه‌ده {وَبِالذَّارِيَاتِ ذَرْوًا} قَسَميله اوڭا إشارت ايدر. أوت بو إشارتده لفظًا و صورةً سورۀِ {وَالذَّارِيَاتِ ذَرْوًا} و رسالۀِ ذرّات، بربرينه مشابهت ايله برابر معنا جهتيله دخى مناسبت وار. چونكه سورۀِ {وَالذَّارِيَات}ڭ باشنده تصادفى و إنتظامسز ظن ايديلن تموّجاتِ هوائيه، غايت حكمتلى و وظيفه‌دار اولارق ربوبيتڭ تكوينى أمرلرينى أطرافه يتيشديرر دييه إفاده ايتديگى گبى؛ رسالۀِ ذرّات دخى مادّيونلر طرفندن تصادفى و إنتظامسز تلقّى ايديلن حركاتِ ذرّات دخى، غايت حكمتلى و او ذرّه‌لر منتظم وظيفه‌لرله وظيفه‌دار اولدقلرينى غايت قوّتلى و قطعى برهانلر ايله إثبات ايدييور