أى عالمِ إسلامڭ دنيا و آخرتده سلامتى ايچون قرآنڭ فيضيله و رسالۀِ نورڭ حقيقتيله و صادق شاكردلرڭ همّتيله مبارك گوزلرندن ياش يرينه قان آقيتان و أى فتنۀِ آخر زمانڭ شو دغدغه‌لى و فورطنه‌لى زماننده حضرتِ أيوب عليه السلامدن زياده خسته‌لقلره، دردلره گرفتار اولان و قرآنڭ نوريله و رسالۀِ نورڭ برهانلريله و شاكردلرڭ غيرتيله عالمِ إسلامڭ مادّى و معنوى خسته‌لقلرينى حكيمِ لقمان گبى تداوى‌يه چاليشان و أى مبارك أللرنده موجود اولان نور پارچه‌لرينڭ حق و حقيقت اولديغنى قرآنڭ اوتوز اوچ آيتيله و كرامتِ عَلَويه و غوثيه ايله إثبات ايدن و أى كنديسى خسته و إختيار و ضعيف و غايت آجينه‌جق بر حالده اولديغنه گوره هركسدن زياده عالمِ إسلامه جان فدا ايدر درجه‌سنده آجييه‌رق كندينه فنالق ايتمك ايسته‌ينلره قرآنڭ حقيقتيله و رسالۀِ نورڭ حجّتلريله، نور طلبه‌لرينڭ صداقتلريله خيرلى دعالر و اييلك ايتمك ايله قارشيلايان و يازديغى مهمّ أثرلرندن آيت الكبرانڭ طبعيله كندى ذاتنه و طلبه‌لرينه گلن مصيبتده حپسخانه‌لره دوشن و او زندانلرى قرآنڭ إرشاديله و رسالۀِ نورڭ درسيله و شاكردلرڭ إشتياقيله بر مدرسۀِ يوسفيه‌يه چويرن و بر درسخانه ياپان و ايچمزده بولونان جاهل اولانلرڭ هپسنى قرآنى او درسخانه‌ده ختم ايتديره‌رك چيقاران؛ و او مصيبتده قرآنڭ قوّۀِ قدسيه‌سيله و رسالۀِ نورڭ تسلّيسيله و قارداشلرڭ تحمّللريله إختيار و ضعيف اولديغى حالده بتون آغيرلقلريمزى و يوكلريمزى اوزرينه آلان و يازديغى ميوه و مدافعه‌نامه رساله‌لريله قرآنِ معجز البيانڭ إعجازيله و رسالۀِ نورڭ قوّتلى برهانلريله و شاكردلرڭ إخلاصى ايله، إذنِ إلٰهى ايله او زندان قپولرينى آچديروب برائت قزانديران و او گونده بزه و عالمِ إسلامه بايرام ياپديران و حقيقةً رسالۀِ نورلرى {نُورٌ عَلٰى نُورٍ} اولديغنى إثبات ايده‌رك قيامته قدر سربست اوقونوب و يازيلماسنه حق قزانديران و عالمِ إسلامڭ قرآنِ عظيم الشانڭ غداءِ قدسيسيله و نورڭ اُخروى طعاميله و شاكردلرينڭ إشتهاسيله أكمك، صو و هوا گبى بو نورلره پك چوق إحتياجى اولديغنى و بو نورلرى اوقويوب يازانلردن بيڭلر كيشى ايمانله قبره گيرديگنى إثبات ايدن و كنديسنه منسوب طلبه‌لرينى هيچ بر يرده مغلوب و محجوب ايتمه‌ين و اليوم قرآنڭ سماوى درسلريله و رسالۀِ نورڭ أساساتيله و شاكردلرينڭ ذكاوتلريله و ميوه‌نڭ اوننجى و اون برنجى مسئله و چيچكلريله فراق آتشيله گيجه - گوندوز يانان قلبلريمزى آبِ حيات و شرابِ كوثر گبى او مبارك ”مسئله“ و ”چيچكلر“ ايله قلبلريمزڭ آتشنى سونديروب سُرور و فرحه سَوق ايدن و أى عالمڭ (قرآنِ عظيم الشانڭ قطعى وعديله و تهديدى ايله و رسالۀِ نورڭ كشفِ قطعيسيله و مرحوم شاكردلرينڭ مشاهده‌سيله و اونلرده‌كى كشف القبور صاحبلرينڭ گورمسيله) أڭ چوق قورقديغى ئولومى أهلِ ايمان ايچون إعدامِ أبديدن قورتاروب بر ترخيص تذكره‌سنه چويرن و عالمِ نوره گيتمك ايچون گوزل بر يولجيلق اولديغنى إثبات ايدن و كافر و منافقلر ايچون إعدامِ أبدى اولديغنى بيلديرن قرآنِ معجز البيانڭ، بيڭ معجزاتِ أحمديه عليه الصلاة والسلام و قرق وجهِ إعجازينڭ تصديقى آلتنده إخباراتِ قطعيه‌سيله، اوندن چيقان رسالۀِ نورڭ أڭ معنّد دشمنلرينى مغلوب ايدن حجّتلريله و نور شاكردلرينڭ چوق أماره‌لرڭ و تجربه‌لرڭ و قناعتلرينڭ تسليميله او قورقونج، قراڭلق، صوغوق و طار قبرى، أهلِ ايمان ايچون جنّت چوقورندن بر چوقور و جنّت باغچه‌سنڭ بر قپوسى اولديغنى إثبات ايدن و كافر و منافق زنديقلر ايچون جهنّم چوقورندن ييلان و عقربلرله طولو بر چوقور اولديغنى إثبات ايدن و اورايه گله‌جك اولان مُنكَر نكير إسمنده ملائكه‌لرى أهلِ حق و حقيقت يولنده گيدنلر ايچون برر مونس آرقداش ياپان و رسالۀِ نورڭ شاكردلرينى طلبۀِ علوم صنفنه داخل ايدوب مُنكَر نكير سؤاللرينه رسالۀِ نور ايله جواب ويردكلرينى مرحوم قهرمان شهيد حافظ على‌نڭ وفاتيله كشف ايدن و حياتده بولونانلريمزڭ ده ينه رسالۀِ نورله جواب ويرمه‌مزى رحمتِ إلٰهيه‌دن دعا و نياز ايدن و حضرتِ قرآنى، قرآنِ عظيم الشانڭ قرق طبقه‌دن هر طبقه‌يه گوره بر نوع إعجازِ معنويسنى گوسترمه‌سيله و عموم كائناته باقان كلامِ أزلى اولماسيله و تفسيرى اولان رسالۀِ نورڭ معجزاتِ قرآنيه و رموزاتِ ثمانيه رساله‌لريله و رسالۀِ نور گُل فابريقه‌سنڭ سركاتبى گبى قهرمان قارداشلرڭ و شاكردلرڭ فوق العاده غيرتلريله عصرِ سعادتدن بَرى بويله خارقه بر صورتده معجزه‌لى اولارق يازيلماسنه هيچ كيمسه قادر اولماديغى حالده رسالۀِ نورڭ قهرمان بر كاتبى اولان خسروه ”ياز“ أمر بيورلماسيله، لوحِ محفوظده‌كى يازيلان قرآن گبى يازيلماسى و قرآنِ عظيم الشانڭ حق كلام اﷲ اولديغنى و بتون سماوى كتابلرڭ أڭ بيوگى و أڭ أفضلى و بر فاتحه ايچنده بيڭلر فاتحه و بر إخلاص ايچنده بيڭلر إخلاص و حروفاتنڭ بردن اون و يوز و بيڭ و بيڭلر ثواب و حسنه ويردكلرينى هيچ گورولمه‌دك و ايشيدلمه‌دك پك گوزل و خارقه بر صورتده تعريف و إثبات ايدن و قرآنِ معجز البيانڭ بيڭ اوچيوز سنه‌دن بَرى إعجازينى گوسترمه‌سيله و معارضلرينى طورديرماسيله و نورڭ گوزلره گوسترر درجه‌ده ظاهر دليللرى ايله و نور شاكردلرينڭ ألماس قلملريله بو زمانه قدر مِثلى گورولمه‌دك رسالۀِ نورڭ دنيايه فرمان اوقويان و أڭ متمرّد و معنّدلرى صوصديران يگرمى بشنجى سوز و ذيللرى قرق وجهله إعجازِ قرآنى اولديغنى إثبات ايدن و أى حضرتِ پيغمبر عليه الصلاة والسلامڭ حق پيغمبر اولديغنه و عموم يوز يگرمى درت بيڭ پيغمبرلرڭ أفضلى و سيّدى اولديغنه دائر بيڭلر معجزه‌لرينى ”معجزاتِ أحمديه“ (ع‌ص‌م) نامنده‌كى رسالۀِ نورى ايله گوزل بر صورتده إثبات ايدن و قرآنِ عظيم الشانڭ رسولِ أكرم عليه الصلاة والسلامڭ رحمةً لِلعالمين اولديغنى كائناتده إعلان ايتمه‌سيله و نورڭ باشدن نهايته قدر اونڭ رحمةً لِلعالمين اولديغنى برهانلرله إثبات ايتمه‌سيله و او رسولڭ أفعال و أحوالى، كائناتده نمونۀِ إقتدا اولاجق أڭ صاغلام، أڭ گوزل رهبر اولديغنى حتّى كورلره ده گوسترمه‌سيله و آناطولى و خصوصى مملكتلرده نورڭ إنتشارى زماننده بلالرڭ رفعى و صوصديريلماسيله مصيبتلرڭ گلمه‌سى شهادتيله و نور شاكردلرينڭ غايت آغير مشكلاتلر ايچنده كمالِ متانتله خدمت و إرتباطلريله او ذاتڭ (ع‌ص‌م) سنّتِ سنيه‌سنه إتّباع ايتمك نه قدر كارلى اولديغنى و بر سنّته بو زمانده إتّباعده يوز شهيدڭ أجرينى قزانديغنى بيلديرن و صدقه، قضا و بلايى ناصل دفع ايدييورسه رسالۀِ نورڭ ده آناطولى‌يه گله‌جك قضايى، بلايى، يگرمى سنه‌در دفع ايتديگنى عين اليقين إثبات ايدن استادِ أكرممز أفنديمز حضرتلرى