إدّعانامه‌ده بنم حقّمده درت أساس وار

برنجى أساس: گويا بنده تفاخر و خودفروشلق وار و كنديمى مجدّد بيلييورم

بن بتون قوّتمله بونى ردّ ايدرم. هم مهديلك إسنادينى هيچ قبول ايتمديگمه بتون قارداشلرم شهادت ايدرلر. حتّى دڭزليده‌كى أهلِ وقوف، ”أگر سعيد مهديلگنى اورته‌يه آتسه بتون شاكردلرى قبول ايده‌جك“ ديدكلرينه مقابل، سعيد إعتراضنامه‌سنده ديمش كه: ”بن سيّد دگلم. مهدى سيّد اولاجق.“ دييه اونلرى ردّ ايتمش

ايكنجى أساس: نشرياتى گيزلمه‌سى

گيزلى دشمنلر ياڭليش معنا ويرديرمه‌سين. يوقسه سياسته و دنيا آسايشنه تماس جهتيله دگلدر. هم أسكى حرف ايله تكثير ماكينه‌سنى بر بهانه بولماسينلر. مصطفى كماله قارشى نورڭ طوقادى ايسه (حاشيه) آلتى محكمه و آنقره مقاماتى بيلمش، ايليشمه‌مشلر و بزه برائت ويرديلر و بشنجى شعاع ايله برابر بتون كتابلريمزى إعاده ايتديلر. هم اونڭ فنالغنى گوسترمك، اوردونڭ قيمتنى محافظه ايتمك ايچوندر. بر شخصى سومه‌مسى، اوردويى محبّتكارانه ثنا ايچوندر

------------------------------------------------------------------

حاشيه : إدّعانامه‌ده ياڭليش بر معنا ويروب، نورڭ كرامتلرندن طوقات طرزنده‌كى بر قسمنى، مدارِ إتهام صايمش. گويا نورلره هجوم زماننده گلن زلزله گبى بلالر نورڭ طوقاتلريدر. حاشا ثمّ حاشا!.. بز اويله ديمه‌مشز و يازمامشز. بلكه مكرّر يرلرده حجّتلريله ديمشز كه: نورلر مقبول صدقه گبى بلالرڭ دفعنه وسيله‌در. نه وقت نورلره هجوم ايديلسه، نورلر گيزله‌نير؛ مصيبتلر فرصت بولوب، باشمزه گلييورلر. أوت نورڭ بيڭلر شاكردلرينڭ تصديق و مشاهده‌لريله، يوزلر وقوعات و حادثات ايله تصادف إحتمالى اولميان او حادثاتڭ توافقلرى و قرآنڭ متعدّد إشارات و توافقاتيله، حتّى محكمه‌لرده قسمًا گوستريلديگى جهتله قطعى قناعتمز وار كه؛ او توافقات رسالۀِ نورڭ مقبوليتنه بر إكرامِ إلٰهيدر و قرآن حسابنه نورلره بر نوع كرامتلردر