ثانيًا: أميرطاغنده اوراده بتون بنم ايله قونوشان ذاتلرڭ شهادتلريله و أهالينڭ و ضابطه‌نڭ تصديقيله برائتمدن صوڭره بتون قوّتمله إنزوامده دنيا سياستنه قاريشمقدن چكينمشم. حتّى تأليفى و مخابره‌يى ده بيراقمشدم. يالڭز تكراراتِ قرآنيه و مَلكلره دائر ايكى نكته‌دن باشقه تأليف ايتمدم. و هفته‌ده بر مكتوب بر يره نورلره تشويق ايچون يازاردم. حتّى مفتى اولان ئوز قارداشمه و يگرمى سنه يانمده طلبه‌لك ايدن و بنى چوق مراق ايدن و بايرام تبريكلرى يازان او برادريمه اوچ سنه‌ده اوچ درت مكتوب يازدم. مملكتمده‌كى برادريمه يگرمى سنه‌ده هيچ يازماديغم حالده إدّعانامه‌ده بنى أمنيتى إخلال صوچى ايله إتهام ايدوب و جربزه ايله أسكى نقراتى تازه‌له‌يه‌رك ”إنقلابه قارشى گلييور“ ديمش. بوڭا قارشى ديرز: يگرمى سنه ظرفنده يگرمى بيڭ نور نسخه‌لرينى مراق و قبول ايله اوقويان يگرمى بيڭ، بلكه يوز بيڭ آدمدن آلتى محكمه و علاقه‌دار اون ولايتڭ ضابطه‌لرى أمنيتى إخلاله دائر هيچ بر مادّه‌يى قيد ايتمه‌مسى گوسترييور كه؛ حقّمزده بيڭلر إحتمالدن آنجق بر تك إحتمال ايله بر إمكانه قطعى وقوعات نظريله باقييور. حالبوكه ايكى اوچ إحتمالدن بر إحتمال اولسه، أثرى گورولمزسه هيچ بر صوچ اولماز. هم بيڭلر إحتمالدن بر إحتمال دگل، بلكه هر آدم، هم عليهمه هجوم ايدن مدّعى چوق آدملرى ئولديره‌بيلير. آنارشيست و قومونيست حسابنه أمنيتى، آسايشى بوزابيلير، أمنيتى إخلال ايده‌بيلير. ديمك بويله پك عجيب و إفراطكارانه إمكاناتى وقوعات يرنده إستعمال ايتمك، عدليه‌يه و قانونه قارشى إهانتدر

هم هر حكومتده مخالفلر بولونور. يالڭز فكرًا مخالفت بر صوچ اولماز. حكومت أله باقار، قلبه باقماز. و بِالخاصّه وطن و ملّته ضررسز، چوق خدمتى و فائده‌سى بولونان و صوڭره حياتِ إجتماعيه‌يه قاريشميان و تجريدِ مطلقده ياشاتديريلان و أثرلرى عالمِ إسلامڭ أڭ مهمّ مركزلرنده كمالِ تقدير و تحسين ايله قارشيلانان (حاشيه) بر آدم حقّنده بو پك عجيب و أصلسز إتهاملرى ياپانلر، آنارشيلك بلكه قومونيستلك حسابنه بيلميه‌رك إستعمال ايديلييور دييه أنديشه ايدييورز

--------------------------------------------------------------------------

(حاشيه : بو أثرلرى حقّنده مقامِ إدّعا إدّعانامه‌سنده يوز ياڭليشندن سكساننجى ياڭليشنده ديمش كه: ”بشنجى شعاعده‌كى تأويللر ياڭليشدر.“ الجواب: بشنجى شعاعده ”اﷲ أعْلَم بر تأويلى بودر“ جمله‌سى دينيلديگندن معناسى بودر كه: ”بو حديثڭ بر إحتمال ايله معناسى بو اولمق ممكندر“ ديمكدر. بو ايسه منطقجه تكذيبى قابل دگل. يالڭز محاليتنى إثبات ايله تكذيب ايديله‌بيلير. ثانيًا: يگرمى سنه‌دن بَرى بلكه قرق سنه‌دن بَرى بنم معارضلرم و رسالۀِ نوره إعتراضه چاليشانلر، هيچ بر تأويلمزى علمًا، منطقًا ردّ ايتمدكلرى و او معارض علمالرله برابر نور شاكردلرينڭ بيڭلر عالملرى تصديق ايدوب، ”فيه نظر“ ديمدكلرى حالده؛ قرآنڭ قاچ سوره اولديغنى بيلمه‌ين، بونى إنكار ايله قارشيلاسه نه قدر إنصاف خارجنده اولديغنى، إنصافڭزه حواله ايدييورم. الحاصل تأويلڭ معناسى، حديثڭ وياخود آيتڭ بر چوق معنالرندن بر ممكن و محتمل معناسى ديمكدر