إدّعانامه بنى استادم سعيد النورسى‌نڭ هم سر كاتبى، هم كنديسيله هم رسالۀِ نورله شدّتلى علاقه‌لى، هم چوق خدمت ايتديگمى بحثله بو حركتمى مدارِ مسئوليت صايمش. بن ده بوڭا قارشى، بتون قوّتمله بو إتهامى قبول ايدوب إفتخار ايدييورم. چونكه فطرتمده علمه قارشى غايت قوّتلى بر إشتياق وار. بر دليلى شودر كه: دڭزلى حادثه‌سنده منزلم تحرّى ايديلديگى وقت بشيوز سكسان عدد متنوّع كتبِ علميه و عربيه أويمده بولونديغى رسمًا ثابت اولمشدر. بنم فقرِ حالمله و گنجلگمله و لسانِ عربى‌ده نقصانيتمله برابر بو زمانده بيڭده بر شخصده بولونميان بو متنوّع بشيوز سكسان جلد كتابى بڭا طوپلاتديران، فوق العاده بر طلبه‌لك شوقى و خارقه بر عشقِ علميدر.

ايشته بو فطرى إستعداد ايله دائما حقيقى بر استاد آرايوردم. جنابِ حقّه حدسز شكر اولسون كه، اوزاقده آراديغمى پك ياقينده أليمه ويردى. أوت استادم اولان سعيد النورسى‌نڭ بتون حياتنڭ غايه‌سى، شوقِ علمده و علومِ إسلاميه‌يى بيلمك عشقنده گچديگنى بتون حياتى شهادت ايدييور. هم بن مشاهداتمله، هم استاديمڭ مطبوع تاريخچۀِ حياتيله، هم أسكى طلبه‌لرندن آلديغم معلوماتله قطعى بيلدم كه؛ بنده‌كى فطرى عشقِ علمى، استادمده خارقه بر صورتده بولونويور كه، بو زمانده بتون مدرسه عالملرينڭ خلافنه اولارق پك خارقه، تك باشيله مدرسه طلبه‌لگنى محافظه ايدوب هر بلايه تحمّل ايتمش. حتّى أهلِ سياست، استاديمڭ بو عجيب حاللرينى آڭلامدقلرى ايچون، هيچ علاقه‌سى اولميان بر نوع سياسته تماس ايتديرمگه چاليشمشلر. حتّى حپسلره صوقمشلر. فقط صوڭره جنابِ حق، او عشقِ علمى‌يى قرآنڭ حقائقنه بر آناختار ياپمش. بتون أهلِ علمى و فيلسوفلرى حيرتده بيراقان رسالۀِ نور ميدانه چيقمش. بن ده او صيره‌ده بتون حياتمده آراديغم و كندى فطرتمده و فقط پك يوكسك بولونان بو استادى بر إحسانِ إلٰهى اولارق قسطمونيده يانمده بولدم. آخر عمريمه قدر ده، بوڭا تشكّر ايدييورم