(أميرطاغلى مصطفى‌نڭ مدافعه‌سيدر)

آفيون آغير جزا محكمه‌سنه

مقامِ إدّعانڭ، استادم بديع الزمانڭ موهوم صوچنه بنى إشتراك ايتديرمسنه قارشى قيصه‌جه ديرم كه:

إنتسابمدن ذرّه قدر پشيمان اولميه‌رق استاديمه و رسالۀِ نوره ياپديغم خدمتم، آنجق بر دريا قدر لطف و إحسانه قارشى بر طامله ايله مقابله گبيدر. ناصلكه غايت قيمتدار ألماس خزينه‌لرينه صاحب اولمق يولنده كوچك جام پارچه‌لرى تردّدسز فدا ايديليرسه، أبدى حياتمى قورتارمغه وسيله اولان رسالۀِ نور اوغرنده حياتمى فدا ايتمگه هر آن حاضرم. اُخروى و دنيوى حدسز منفعتلرى تحقّق ايدن رسالۀِ نوردن فانى و أهمّيتسز حپسلرڭ و صيقنتيلرڭ خاطرى ايچون، قيصه و دغدغه‌لى حياتِ دنيويه‌يه ضرر گلمه‌مك ايچون او منفعتِ عظيمه‌يى ترك ايتمك، رسالۀِ نوره و استاديمه قارشى طورغونلق گوسترمك؛ او مبارك استاده، او قدسى علاّمۀِ زمانه و اونڭ بر تك غايه‌سى اولان ايمان و قرآنه بيوك بر إهانت اولديغنى بيلييورم. و اونڭ إذن و أمرندن ذرّه قدر خلافِ حركت ايتمك ايسته‌مييورم.

محترم هيئتِ حاكمه

زهرلى ميقروبلرينى گوزل وطنمزه طاغيتمق ايسته‌ين بولشويزمه قارشى قوّتلى بر جبهه آلان بيوك بر دين عالمنه فقيرلگمله طلبه اولمقلغم نه‌دن چوق گورولويور؟ شبهه‌سز بو وضعيت إثبات ايدييور كه؛ نورلرده‌كى زنگينلك، دنيوى زنگينلگڭ پك فوقنده‌در. بنم گبى ميليونلرى آشان تورك گنجلگنڭ ايمانلرينى قورتاروب وطنه نافع برر عضو اولمالرى ايچون، استاديمى و رسالۀِ نورى دائما سربست بيراقڭز. بز تورك گنجلگنڭ رسالۀِ نوره إحتياجمز، قپالى زندانده قالمش بر كيمسه‌نڭ هوايه و زفيرى قراڭلقده بولونان بر آدمڭ ضيايه و چولده‌كى آج و صوسز قالمش بر إنسانڭ صويه و غدايه و دڭزده بوغولمق اوزره بولونان هر هانگى بر كيمسه‌نڭ جان قورتاران گميسنه اولان إحتياجندن بيڭلر درجه داها زياده‌در. ايشته يوقاريده بر قسمنى تعداد ايتديگم مذكور حقيقتلردن طولايى فوق العاده حسنِ ظن و توجّهمزى قزانان و قوپماز بر باغله كنديمزى اوڭا باغلاديغمز بديع الزمانى و اوڭا حسنِ نيّت ايله طلبه اولان چوق بيچاره‌لرى بويله حپسلرده چوروتمك عدالتڭ شرفيله قابلِ تأليف اولاماز