بو لاحقه‌لرده گوروله‌جگى گبى، نور مؤلّفى عزيز استاديمز رسالۀِ نورڭ نشرى، اوقونوب يازيلماسى گبى بِالذّات نورلرله إشتغاله أهمّيت ويرمكده، طلبه‌لرينى دائما تشويق ايتمكده‌در. بونڭ لزوم و حكمتى ايسه، شبهه‌سز ايضاحدن وارسته‌در. زيرا عصريمزده كائنات فنلرى و مادّى علملر رواجده اولوب، يڭى يتيشن نسللر بو علم و فنلرى اوقودقلرى؛ هم طبيعيّون و مادّيونڭ دين و معنويات عليهنده‌كى نشرياتى؛ هم كفرِ مطلق جريانى كه، هيچ بر دين و معنوياتى طانيميان و اللّٰهه ايمان حقيقتنه قارشى معارضه ايده‌رك دينسزلگى نشر ايدن، إسلامى فكرى زده‌له‌ين و بتون بشريتى تهديد ايدن، يڭى نسللره و گنجلگه ايمانسزلق فكرِ كفريسنى آشيلامق ايسته‌ين كتاب، بروشور، غزته گبى نشر واسطه‌لرينڭ إسلام و ايمان دشمنلرنجه اوڭ پلانه آلينديغى بويله عجيب و دهشتلى بر زمانده ألبته رسالۀِ نوره، اوقونماسنه، نشر ايديلمسنه شدّتله إحتياج و ضرورت وار.

چونكه رسالۀِ نور، قرآنِ حكيمڭ بر معجزۀِ معنويه‌سى و بو زمانڭ دينسزلگنه قارشى معنوى آتوم بومباسى اولارق صولجيلق جريانلرينڭ معنوياتِ قلبيه‌يى تخريبنه مقابل، معنوياتِ قلبيه‌يى تعمير ايدوب فردًا فردا ايمانِ تحقيقيدن گلن معظّم بر قوّت و قدرته إستنادى اوقويوجيلرڭ قلبلرينه قزانديرييور. و بو وظيفه‌يى ده ينه مقدّس قرآنمزڭ إلهام و إرشاديله و درسيله ايفا ايدييور. تفكّرِ ايمانى درسيله طبيعيّون و مادّيونڭ بوغولديغى عين مسئله‌لرده توحيد نورينى گوسترييور؛ ايمان حقيقتلرينى مادّه عالمندن تمثيللر و دليللر گوستره‌رك ايضاح ايدييور. ليسه‌لرده، اونورسيته‌لرده اوقوتيلان علم و فنلرڭ عين مسئله‌لرنده ايمان حقيقتلرينڭ إثباتنى گونش ظهورنده گوسترييور. بو گبى چوق جهتلرله رسالۀِ نور، بو زمانده أهلِ ايمان و إسلام ايچون اوڭ پلانده أله آلينمه‌سى ايجاب ايدن، أهلِ ايمان ألنده معنوى ألماس بر قلنجدر. عصرڭ إدراكنه، زمانڭ تفهّمنه، آڭلاييشنه خطاب ايدن، إحتياجه أڭ موافق طرزى گوسترن، درس ويرن و طوغريدن طوغرى‌يه فيض و إلهام طريقيله آيتلرڭ ييلديزلرندن گلن درسِ قرآنيدر، كلّى معرفت اﷲ برهانلريدر