بو هفته اوتوز برنجى مكتوبڭ يدنجى لمعه‌سى ايله اوچنجى لمعه‌سنى، خزينۀِ مكتوباته علاوه و محبّان و مشتاقانه تلاوت أيله‌مكله، وساطةِ عاليه‌ڭزله، بر لطفِ عظيمِ إلٰهى‌يه داها مظهر اولديغمدن طولايى كريم، رحيم، باقئِ ذو الجلاله يوز بيڭلر حمد و شكر أيله‌مكده و سَوْگيلى استاديمى رضاىِ صمدانيسنه و وظيفۀِ مشكورۀِ معنويه‌سنده دواملى، نفوذلى، شموللى موفّقيتلره مظهر بيورمسنه عبيدانه تضرّع و نيازلرده بولونمقده‌يم. بو بيچاره و عصيانكاردن چوق دعا بكله‌ديگڭزى أمر بيورويورسڭز. بن او درگاهِ عالى‌يه آنجق بر نوع إعجازينڭ إظهارينه فخر العالمين، حبيبِ ربّ العالمين، سيّد المرسلين صلّى اﷲ تعالى عليه و سلّم أفنديمز حضرتلرينڭ أڭ بيوك معجزه‌سى اولان، تا قيامِ ساعته قدر حكمى و إعجازى باقى اولاجغنه ايمان ايتديگم قرآنڭ نورلرى دلالتيله و استاديمڭ مبارك إسملرينى، وسيلۀِ قبول اولمق اوزره قوللانه‌رق إلتجا ايده‌بيلييورم. هيچ ممكن ميدر كه، بو أشيگه يوزيمى سورركن، ”يا ربّ، استادم سعيد نورسى حضرتلرندن راضى اول، داريْنده مرادلرينى حاصل قيل!“ دييه يالوارميه‌يم؟ أصلا و قطعا. بو بر وظيفه اولمقله برابر، قناعتجه إن شاء اﷲ وسيلۀِ إجابۀِ دعادر.

عزيز استاد! صديقڭزڭ ضعيف روحى، بو فانى حياتده اولديغى گبى، باقى و سرمدى حياتده ده إن شاء اﷲ علوى روحڭزڭ جناحِ شفقتندن آيريلميه‌جقدر، آيريلاميه‌جقدر و آييراميه‌جقلردر.

أوت غيرِ قابلِ إنكاردر كه، بو فانى حياتڭ دغدغه‌لرى آراسنده، حواس و لطائف هر زمان مشتاقى بولوندقلرى منوّر و محتشم آيينه‌يه باقه‌مييورلر؛ فقط او مشغله‌دن فراغت ايديلديگى آنده، ينه نور بتون حشمتيله عرضِ ديدار ايدييور. بو زمانلرده هيچ آيريلق حسّ ايتمييورم. حتّى إختلافِ مكانى ده تأثيرسز گورويورم. يدنجى و اوچنجى لمعه‌لرڭ بورا پوسته‌خانه‌سنه وُرودى، رمضانڭ اون برينه تصادف ايدييور. بر گون پوسته‌ده قالماسنه قارشيلق طوتولورسه، هر بر لمعه، بو مبارك آيڭ باشندن اوننه قدر برر گون آلمشلر و {اَوَّلُهُ رَحمَةٌ} اولان عشرِ اولٰىِ رمضانده محلِّ مقصوده واصل اولمشلردر. مفتيلك إعلاننه گوره تام اوننجى گونده‌در. دردنجى و سكزنجى لمعه‌لرى ده بو ماهِ غفرانڭ اون دردنجى گونى آلدم. پوسته بر گون أوّل گلديگنه و بر گون ده پوسته‌ده قاليشنه ويا برنجى مقامه صاييليرسه بو نورلى أثر ده، صانكه رمضانڭ هر گوننده بر لمعه آلارق يرينى بولمقله، هم بو عددلرڭ بوشنه قونولمديغنه، هم ده {أوْسَطُهُ مَغْفِرَةٌ} اولان عشرِ ثانئِ رمضانده يازيلديغى محلّه يتيشه‌جگنه صراحت درجه‌سنده دلالت ايدييور.