هم مادام محكمه‌جه إثبات ايديلمش كه؛ يگرمى سنه‌دن بَرى سياستله علاقه‌مى كسديگم و هيچ بر أماره عكسنه ظهور ايتمديگى حالده، ألبته بنمله گوروشندن توهّم ايتمك پك معناسزدر. حاشيه)
------------------------------------------------
  (حاشيه : غريب و عجيب بر حادثه: بو آيده بر گون آولويه ايندم، باقدم. گلن قار اوستنده، رسالۀِ نورڭ أجزالرنده توافقاتنه إشارت ايدن بويالر، قيرمزى صارى مركّبلر مِثللو، او قارڭ اوستنده سرپيلمش قطره‌لر و نقطه‌لر وار. چوق حيرت ايتدم. سائر يرلره باقدم، آولومدن باشقه يرلرده يوقدى. أنديشه ايتدم، قلبًا ديدم: رسالۀِ نور عموم مملكتله، بلكه قرآن حسابنه كُرۀِ أرضله او درجه علاقه‌داردر كه، اونڭ باشنه گلن بلادن، مصيبتدن بلوطلر دخى قان آغلايورلر. بر ايكى آدم چاغيردم، اونلر ده حيرت ايتديلر. بنم أنديشه و تلاشمى گورن خانه صاحبنڭ برادرزاده‌سى محمد أفندى ظن ايتدى كه، بن قارڭ چوقلغندن يولى قپامسندن تلاش ايدييورم. بن يوقارى چيقدقدن صوڭره، يولى آچمق ايچون او قارى ايكى طرفه آتوب او إشارتلى معنيدار قيرمزى صارى حادثۀِ جوّيه‌يى قپاتمشدى. اوڭا ديدم: قپاتماسيدڭ داها ايى ايدى. عين گونده، رسالۀِ نور عليهنده اوچ حادثه ظهور أيلدى:     برنجيسى: آفيون عدليه‌سيله بوراده‌كى ضابطه چاوشلغيدر. كتابلريمڭ إعاده‌سنه دائر مراجعتمه مقابل، ”داها تمييزدن تصديق گلمديگندن قاريشمايز“ دييه او جهتدن بنم اميديمى قيردى.     ايكنجيسى: عين گونده، بنم أحوالمى تجسّس ايتمك ايچون مخصوص بر پوليسى، آفيون گوندرديگنى اوگرندك.     اوچنجيسى: عين گونده، إستانبولده بر منافق، إختيار رساله‌سنى بهانه ايده‌رك عليهمزده پروپاغنده ايتمش، عدليه‌يه عكس ايتديرمش.     بو گبى حادثه‌لردن مشتاقلر چكينمگه باشلاديلر. بن ده {لِكُلِّ مُصِيبَةٍ قَالُوا اِنَّا ِﷲِ وَ اِنَّا اِلَيْهِ رَاجِعُونَ} ديدم، {حَسْبُنَا اﷲُ وَ نِعْمَ الْوَكِيلُ} سپرينه گيردم