عزيز، صدّيق، متين، صارصيلماز، ثباتكار، فداكار، وفادار قارداشلرم!
    بيليرسڭز كه آنقره أهلِ وقوفى رسالۀِ نوره عائد كرامتلرى و إشارتِ غيبيه‌لرى إنكار ايده‌مه‌مشلر. يالڭز، ياڭليش اولارق او كرامتلرده بنى حصّه‌دار ظن ايدوب إعتراض ايده‌رك، ”بويله شيلر كتابده يازيلماملى ايدى؛ كرامت إظهار ايديلمز.“ دييه خفيف بر تنقيده مقابل مدافعاتمده اونلره جوابًا ديمشدم كه    اونلر بڭا عائد دگل و او كرامتلره صاحب اولمق بنم حدّم دگل. بلكه قرآنڭ معجزۀِ معنويه‌سنڭ ترشّحاتى و لمعه‌لريدر كه حقيقى بر تفسيرى اولان رسالۀِ نورده كرامتلر شكلنى آلارق (شاكردلرينڭ قوّۀِ معنويه‌لرينى تقويه ايتمك ايچون) إكراماتِ إلٰهيه نوعندندر. إكرام ايسه، إظهارى بر شكردر، جائزدر، هم مقبولدر. شيمدى أهمّيتلى بر سببه بناءً بو جوابى بر پارچه ايضاح ايده‌جگم. و ”نه ايچون إظهار ايدييورم و نه ايچون بو نقطه‌ده بو قدر تحشيدات ياپييورم و نه ايچون بر قاچ آيدر بو موضوعده چوق ايلرى گيدييورم. أكثر مكتوبلر او كرامته باقييور؟“ دييه سؤال ايديلدى.
    الجواب: رسالۀِ نورڭ خدمتِ ايمانيه‌سنده بو زمانده بيڭلر تخريباتجيلره مقابل يوز بيڭلر تعميراتجى لازم گليركن، هم بنمله لا أقل يوزر كاتب و يارديمجى بولونمق إحتياج واركن، دگل چكينمك و تماس ايتمه‌مك، بلكه ملّت و أهلِ إداره تقدير ايله و تشويق ايله يارديم و تماس ايتمك ضرورى ايكن و او خدمتِ ايمانيه حياتِ باقيه‌يه باقديغى ايچون حياتِ فانيه‌نڭ مشغله‌لرينه و فائده‌لرينه ترجيح ايتمك، أهلِ ايمانه واجب ايكن، كنديمى مثال آلارق ديرم كه
    بنى هر شيدن و تماسدن و يارديمجيلردن منع ايتمك ايله برابر عليهمزده اولانلر بتون قوّتلريله آرقداشلريمڭ قوّۀِ معنويه‌لرينى قيرمق و بندن و رسالۀِ نوردن صوغوتمق و بنم گبى إختيار، خسته، ضعيف، غريب، كيمسه‌سز بر بيچاره‌يه، بيڭلر آدمڭ گوره‌جگى وظيفه‌يى (باشنه) يوكله‌مك و بو تجريد و تضييقلرده مادّى بر خسته‌لق نوعنده إنسانلر ايله تماس و إختلاطدن چكيلمگه مجبور اولمق، هم او درجه تأثيرلى بر طرزده خلقلرى اوركوتديرمك كه، أڭ زياده مربوط گورولن بعض دوستلرڭ بڭا سلام ويرمه‌مك، حتّى بعض نمازى ده ترك ايتمك درجه‌سنده اوركوتمك ايله قوّۀِ معنويه‌يى قيرمق جهتلريله و سببلريله، إختيارم خارجنده بتون او مانعلره قارشى رسالۀِ نور شاكردلرينڭ قوّۀِ معنويه‌لرينڭ تقويه‌سنه مدار إكراماتِ إلٰهيه‌يى بيان ايده‌رك رسالۀِ نور أطرافنده معنوى بر تحشيدات ياپديرمق و رسالۀِ نور كندى كندينه، تك باشيله (باشقه‌لرينه محتاج اولميه‌رق) بر اوردو قدر قوّتلى اولديغنى گوسترمك حكمتيله بو چشيد شيلر بڭا يازديريلمش. يوقسه حاشا كنديمزى صاتمق و بگنديرمك و تمدّح ايتمك، خودفروشلق ايتمك ايسه؛ رسالۀِ نورڭ أهمّيتلى بر أساسى اولان إخلاص سرّينى بوزمقدر. إن شاء اﷲ رسالۀِ نور كندى كندينه، هم كندينى مدافعه ايتديگى، هم قيمتنى تام گوسترديگى گبى، بزى ده معنًا مدافعه ايدوب قصورلريمزى عفو ايتديرمگه وسيله اولاجقدر