Эгер шу адам ёлдашының дөвлетли маслахатыны диңлемән, галанҗа пулуны хем учара билет алмагың дерегине харам кейпе совайса, онуң акмак хем бетбагтдыгыны иң бир дүшүнҗесиз адамам аңламазмы? Элбетде, аңлар.

Ине, эй, бинамаз адам! Эй, мениң намазы халамаян небсим!

Ол хәким Раббимиздир, Халыгымыздыр. Ол ики хызматкәр ёлагчыларың бириси диндардыр, намазыны хөвес билен окар; бейлекиси болса, гапыл, бинамаз ынсандыр.

Ол йигрими дөрт алтын пул болса, йигрими дөрт сагатдыр, адамың гүнделик өмрүдир. Ол хас гөзел мүлк хем җеннетдир. Ол станция габырдыр. Ол сыяхат болса, адамзады габра, хашра, эбедиете элтйән бешер ёлагчылыгыдыр. Ол узак ёлы хер ким өз амалына, таквалык кувватына гөрә, хер хили гечер. Таквалар әхлиниң бир кысмы бу мүң йыллык ёлы йылдырым чалтлыгында гечер. Бейлеки бир кысмы элли мүң йыллык ёлы эдил хыялдакы ялы, бир гүнде гечер. Куръаны-Азымүшшан бу хакыкаты ики аятында гөркезйәр.(Ю)