شيعۀِ ولايت أگر ديسه كه: حضرتِ على‌نڭ (ر‌ض) كمالاتِ فوق العاده‌سى قبول اولوندقدن صوڭره، حضرتِ صدّيقى (ر‌ض) اوڭا ترجيح ايتمك قابل اولمايور.

الجواب: حضرتِ صدّيقِ أكبرڭ و فاروقِ أعظمڭ (ر‌ض) شخصى كمالاتيله و وراثتِ نبوّت وظيفه‌سيله زمانِ خلافتده‌كى كمالاتى ايله برابر بر ميزانڭ كفه‌سنه، حضرتِ على‌نڭ (ر‌ض) شخصى كمالاتِ خارقه‌سيله، خلافت زماننده‌كى داخلى بِالمجبوريه گيرديگى أليم واقعه‌لردن گلن و سوءِ ظنلره معروض اولان خلافت مجاهده‌لرى برابر ميزانڭ ديگر كفه‌سنه بيراقيلسه؛ ألبته حضرتِ صدّيقڭ (ر‌ض) وياخود فاروقڭ (ر‌ض) وياخود ذى النّوريْنڭ (ر‌ض) كفه‌سى آغير گلديگنى أهلِ سنّت گورمش، ترجيح ايتمش. هم اون ايكنجى و يگرمى دردنجى سوزلرده إثبات ايديلديگى گبى: نبوّت، ولايته نسبةً درجه‌سى او قدر يوكسكدر كه؛ نبوّتڭ بر درهم قدر جلوه‌سى، بر بطمان قدر ولايتڭ جلوه‌سنه مرجّحدر. بو نقطۀِ نظردن حضرتِ صدّيقِ أكبرڭ (ر‌ض) و فاروقِ أعظمڭ (ر‌ض) وراثتِ نبوّت و تأسيسِ أحكامِ رسالت نقطه‌سنده حصّه‌لرى طرفِ إلٰهيدن زياده ويريلديگنه، خلافتلرى زمانلرنده‌كى موفّقيتلرى أهلِ سنّت و جماعتجه دليل اولمش. حضرتِ على‌نڭ (ر‌ض) كمالاتِ شخصيه‌سى، او وراثتِ نبوّتدن گلن او زياده حصّه‌يى حكمدن إسقاط ايده‌مديگى ايچون، حضرتِ على (ر‌ض) شيخَيْنِ مكرّميْنڭ زمانِ خلافتلرنده اونلره شيخ الإسلام اولمش و اونلره حرمت ايتمش. عجبا حضرتِ على‌يى (ر‌ض) سَون و حرمت ايدن أهلِ حق و سنّت، حضرتِ على‌نڭ (ر‌ض) سَوْديگى و جدّى حرمت ايتديگى شيخَيْنى ناصل سومه‌سين و حرمت ايتمه‌سين؟

بو حقيقتى بر مثال ايله ايضاح ايده‌لم. مثلا: غايت زنگين بر ذاتڭ إرثيتندن أولادلرينڭ برينه يگرمى بطمان گوموش ايله درت بطمان آلتون ويريلييور. ديگرينه بش بطمان گوموش ايله بش بطمان آلتون ويريلييور. اوبرينه ده اوچ بطمان گوموش ايله بش بطمان آلتون ويريلسه؛ ألبته آخرده‌كى ايكيسى چندان كميةً آز آلييورلر، فقط كيفيةً زياده آلييورلر. ايشته بو مثال گبى شيخَيْنڭ وراثتِ نبوّت و تأسيسِ أحكامِ رسالتندن تجلّى ايدن حقيقتِ أقربيتِ إلٰهيه آلتونندن حصّه‌لرينڭ آز بر فضله‌لغى، كمالاتِ شخصيه و ولايت جوهرندن نشئت ايدن قربيتِ إلٰهيه‌نڭ و كمالاتِ ولايتڭ و قربيتڭ چوغنه غالب گلير. موازنه‌ده بو نقطه‌لرى نظره آلمق گركدر. يوقسه شخصى شجاعتى و علمى و ولايتى نقطه‌سنده بربرى ايله موازنه ايديلسه، حقيقتڭ صورتى دگيشير. هم حضرتِ على‌نڭ (ر‌ض) ذاتنده تمثّل ايدن شخصِ معنوئِ آلِ بيت و او شخصيتِ معنويه‌ده وراثتِ مطلقه جهتيله تجلّى ايدن حقيقتِ محمّديه (ع‌ص‌م) نقطه‌سنده موازنه ايديلمز. چونكه اوراده پيغمبر عليه الصلاة والسلامڭ سرِّ عظيمى وار.