بشنجيسى: {مُحَمَّدٌ رَسُولُ اﷲِ وَالَّذِينَ مَعَهُ اَشِدَّاءُ عَلَى الْكُفَّارِ رُحَمَاءُ بَيْنَهُمْ تَرٰيهُمْ رُكَّعًا سُجَّدًا} إلى آخر... شو آيتڭ باشى، صحابه‌لرڭ أنبيادن صوڭره نوعِ بشر ايچنده أڭ ممتاز اولدقلرينه سبب اولان سجاياىِ عاليه و مزاياىِ غاليه‌يى خبر ويرمكله، معناىِ صريحيله؛ طبقاتِ صحابه‌نڭ إستقبالده متّصف اولدقلرى آيرى آيرى ممتاز خاص صفتلرينى إفاده ايتمكله برابر، معناىِ إشاريسيله؛ أهلِ تحقيقجه وفاتِ نبويدن صوڭره مقامنه گچه‌جك خلفاىِ راشدينه خلافت ترتيبى ايله إشارت ايدوب هر بريسنڭ أڭ مشهور مدارِ إمتيازلرى اولان صفاتِ خاصّه‌يى دخى خبر ويرييور. شويله كه

{وَالَّذِينَ مَعَهُ} معيتِ مخصوصه و صحبتِ خاصّه ايله و أڭ أوّل وفات ايده‌رك ينه معيتنه گيرمكله مشهور و ممتاز اولان حضرتِ صدّيقى گوسترديگى گبى، {اَشِدَّاءُ عَلَى الْكُفَّارِ} ايله إستقبالده كُرۀِ أرضڭ دولتلرينى فتوحاتيله تيتره‌ته‌جك و عدالتيله ظالملره صاعقه گبى شدّت گوستره‌جك اولان حضرتِ عُمَرى گوسترر. و {رُحَمَاءُ بَيْنَهُمْ} ايله إستقبالده أڭ مهمّ بر فتنه‌نڭ وقوعى حاضرلانيركن كمالِ مرحمت و شفقتندن إسلاملر ايچنده قان دوكولمه‌مك ايچون روحنى فدا ايدوب تسليمِ نفس ايده‌رك قرآن اوقوركن مظلومًا شهيد اولماسنى ترجيح ايدن حضرتِ عثمانى ده خبر ويرديگى گبى، {تَرٰيهُمْ رُكَّعًا سُجَّدًا يَبْتَغُونَ فَضْلاً مِنَ اﷲِ وَ رِضْوَانًا} سلطنت و خلافته كمالِ لياقت و قهرمانلقله گيرديگى حالده و كمالِ زهد و عبادت و فقر و إقتصادى إختيار ايدن و ركوع و سجودده دوامى و كثرتى هركسجه مصدّق اولان حضرتِ على‌نڭ (ر‌ض) إستقبالده‌كى وضعيتنى و او فتنه‌لر ايچنده‌كى حربلريله مسئول اولماديغنى و نيّتى و مطلوبى فضلِ إلٰهى اولديغنى خبر ويرييور