آلتنجيسى: {ذٰلِكَ مَثَلُهُمْ فِى التَّوْرٰيةِ} فقره‌سى، ايكى جهت ايله إخبارِ غيبيدر.

برنجيسى: حضرتِ پيغمبر عليه الصلاة والسلام گبى اُمّى بر ذاته نسبةً غيب حكمنده اولان توراتده‌كى أوصافِ صحابه‌يى خبر ويرييور. أوت توراتده (اون طوقوزنجى مكتوبده بيان ايديلديگى گبى) آخر زمانده گله‌جك پيغمبرڭ صحابه‌لرى حقّنده توراتده بو فقره وار: ”قدسيلرڭ بايراقلرى برابرلرنده‌در.“ يعنى اونڭ صحابه‌لرى أهلِ طاعت و عبادت و أهلِ صلاحت و ولايتدرلر كه، او وصفلرى ”قدسيلر“ يعنى ”مقدّس“ تعبيريله إفاده ايتمشدر. توراتڭ پك چوق آيرى آيرى لسانلره ترجمه ايديلمسى واسطه‌سيله او قدر تحريفات اولديغى حالده، شو سورۀِ فتحڭ {مَثَلُهُمْ فِى التَّوْرٰيةِ} حكمنى متعدّد آياتيله تصديق ايدييور.

ايكنجى جهت إخبارِ غيبى شودر كه: {مَثَلُهُمْ فِى التَّوْرٰيةِ} فقره‌سيله إخبار ايدييور كه: ”صحابه‌لر و تابعينلر، عبادتده اويله بر درجه‌يه گله‌جكلر كه، روحلرنده‌كى نورانيت، يوزلرنده پارلايه‌جق و جبهه‌لرنده كثرتِ سجوددن حاصل اولان بر خاتمِ ولايت نوعنده آلنلرنده سكّه‌لر گورونه‌جك.“ أوت إستقبال بونى وضوح ايله و قطعيت ايله و پارلاق بر صورتده إثبات ايتمشدر. أوت او قدر عجيب فتنه‌لر و دغدغۀِ سياست ايچنده، گيجه و گوندوزده زين العابدين گبى بيڭ ركعت نماز قيلان و طائوسِ يمنى گبى، قرق سنه ياتسو آبدستيله صباح نمازينى أدا ايدن چوق مهمّ پك چوق ذاتلر، {مَثَلُهُمْ فِى التَّوْرٰيةِ} سرّينى گوسترمشلردر.