دردنجيسى: رسالۀِ نور شاكردلرندن نظمى‌در. رؤياسنده اوڭا دييورلر كه: ”رسالۀِ نور شاكردلرى ايمانسز ئولمزلر، قبره ايمان ايله گيررلر.“

بو رؤيالر حضرتِ پيغمبر عليه الصلاة والسلام ايله مناسبتدار اولمق جهتيله، او رؤيالر زماننده ”معجزاتِ أحمديه رساله‌سى“ مناسبتيله لطيف و كوچك بر ايكى توافقڭ لطائفنى ذكر ايده‌جگم. شويله كه:

رسالۀِ نور أجزالرندن بر قاچ وجهله كرامتى گورولن، معجزاتِ أحمديه‌يه دائر اون طوقوزنجى مكتوبڭ تصحيحى زماننده، يدى معجزاتِ أحمديه‌يه (ع‌ص‌م) مظهر يدى چوجغڭ بحثنه گلديگى وقتده، مليحه إسمنده يدى ياشنده‌كى قيزم، اومولمدق بر وقتده خانه‌مدن چيقوب استاديمڭ اوطورديغى كوشكه گلدى، او يدى چوجق بحثنى معصومانه چوجقجه‌سنه ديڭله‌مگه باشلادى. چاى ايچمه‌سنى چوق سَوْديگى حالده، كندينه ويريلدى، چوجقلرڭ بحثى بيتنجه‌يه قدر ايچمه‌دى.

او ساعتدن اون دقيقه أوّل، هم اون طوقوزنجى مكتوب، هم معراج رساله‌سى آيرى آيرى تصحيح ايديلييوردى. اون طوقوزنجى مكتوبڭ يوز أللى صحيفه‌سى ايچنده بر تك صحيفه‌ده قورو ديرگڭ آغلاماسندن بحث وار. معراج رساله‌سنده آلتى يوز سطردن بر تك سطر اوندن بحث ايدر. مختلف طرزلرده، مختلف وقتده، مختلف آدملر، مختلف كتابلرده بردن بر تك سوزى سويله‌دكلرينى بن ايشيتدم. او ده، قورو ديرگڭ آغلامه‌سى ايدى. هر برى ايكى كيشيدن عبارت ايكى قسم تصحيحجيلر، عين كلمه اوستنده‌درلر، او كلمه‌يى سويله‌يورلردى. بن حيرت ايله ديدم: ”ايكى طرف ده بر كلمه‌يى سويله‌يورسڭز.“ صوڭره باقدق. معراجڭ تصحيحى عين كلمه‌يه گلديگى گبى، اون طوقوزنجى مكتوبڭ تصحيحى ده عين كلمه اوزرنده‌در. بز حاضر اولانلر شبهه‌مز قالمادى كه، يدى ياشنده مليحه‌نڭ يدى چوجق بحثنه توافقى و بو ايكى قسم مصحّحلرڭ عين كلمه‌ده إتّفاقلرى، او معجزاتِ أحمديه بحثنڭ بر كرامتنڭ بر شعاعيدر.