الۀِ نورله مناسبتى تحقّق ايدن حادثه‌لردن بريسى ده شودر كه: رسالۀِ نورڭ إسپارطه‌يه مدارِ بركت اولديغنى چوق أماره‌لرله گوردك و گورويورز. أزجمله:

شكرى أفندى هم كندى كوشكنى، هم مرحوم قارداشى نورى أفندينڭ كوشكنى رسالۀِ نورڭ درس و تأليفنه ويرديگى بر زمانده، اونڭ شهرده‌كى أوينه متّصل بيوك بر خاليچه بناسى آتش آلدى. بتون او بيوك بنا يانديغى حالده، شكرى أفندينڭ أوينه سرايت ايتمدى، حتّى يانان خاليچه بناسنڭ مشتملاتندن اولوب، خاليچه بناسى ايله شكرى أفندينڭ خانه‌سنه بتيشيك اولان أخشاب اودونلق دخى يانمادى. بو وضعيتى گورن هركس حيرت ايچنده قالدى. فقط رسالۀِ نور ايله علاقه‌لرى اولانلرڭ شبهه‌لرى قالمادى كه؛ شكرى أفندى رسالۀِ نورڭ تأليفنه بو ايكى كوشكى ويرديگى ايچون، اونڭ بركتيله خارقه بر صورتده هم كندى خانه‌سى، هم مرحوم قارداشنڭ خانه‌سى او مدهش يانغيندن قورتولدى.

هم رسالۀِ نور يازڭ ناصلكه بيوك بر ياغمور و رحمته سبب اولديغى دليللريله بيان ايديلوب، غوثِ گيلانى‌نڭ (ق‌س) كرامتنه دائر رساله‌ده قيد ايديلن حادثه رسالۀِ نورڭ بر كرامتى اولديغى گبى؛ بو سنه‌كى قيشده رسالۀِ نورڭ مركزِ فعاليتى، بارلادن إسپارطه‌نڭ باغلرينه نقل ايديلمش ايدى. باغلرده صوغوق و فورطنه، شهردن چوق شدّتلى اولويوردى. بو شدّتلى قيشده رسالۀِ نورڭ درسى تعطيل اولمامق و ناشرى ده طايانه‌بيلمك ايچون، بر أثرِ رحمت اولارق بو سنه‌نڭ قيشى غايت معتدل گچدى. أوت هركس بيلييور كه، شيمدى‌يه قدر بويله معتدل و بعض گونلرى يازه بڭزر طرزده بر قيش، بو ياقين زمانلرده گورولمه‌مشدى. ايشته بوگون، يڭى مارت اون ايكى، أسكى شباط يگرمى يديدر. ستّۀِ ثَوْر دينيلن فورطنه‌لى آلتى مشهور گونڭ اوچنجى گونى اولان بوگون، نَوْروز گونى گبى آچيقدر، گوزلدر. ناصلكه رسالۀِ نورڭ بركتى يوزندن رحمتِ إلٰهيه ياز اورته‌سنده بر بهار گتيرديگنى قناعت ويره‌جك أماره‌لر ايله گورمشدك؛ اويله ده بو قيش اورته‌سنده رسالۀِ نورڭ بركتى يوزندن بر گوز موسمى اولماسنه بر وسيله اولديغنه قناعت ايتدك.