ايكنجيسى: مادام ذاتِ أحمديه (ع‌ص‌م)، إنسانلره اولان حدسز إحساناتِ إلٰهيه‌نڭ أڭ مهمّ بر وسيله‌سيدر. ألبته جنابِ حق حسابنه، حدسز بر محبّته لايقدر. إنسان، سَوْديگى ذاته أگر بڭزه‌مك قابل ايسه، فطرةً بڭزه‌مك ايستر. ايشته حبيب اللّٰهى سَونلرڭ، سنّتِ سنيه‌سنه إتّباع ايله اوڭا بڭزه‌مگه چاليشمه‌لرى، قطعيًا إقتضا ايدر.

اوچنجى نقطه: جنابِ حقّڭ حدسز مرحمتى اولديغى گبى، حدسز بر محبّتى ده واردر. بتون كائناتده‌كى مصنوعاتڭ محاسنى ايله و سوسلنديرمسيله كندينى حدسز بر صورتده سَوْديرديگى گبى؛ مصنوعاتنى، خصوصًا سَوْديرمسنه سومك ايله مقابله ايدن ذى‌شعور مخلوقاتى سَور. جنّتڭ بتون لطائف و محاسنى و لذائذى و نعماتى، بر جلوۀِ رحمتى اولان بر ذاتڭ نظرِ محبّتنى كندينه جلبه چاليشمق، نه قدر مهمّ و عالى بر مقصد اولديغى بِالبداهه آڭلاشيلير. مادام نصِّ كلاميله؛ اونڭ محبّتنه، يالڭز إتّباعِ سنّتِ أحمديه (ع‌ص‌م) ايله مظهر اولونور. ألبته إتّباعِ سنّتِ أحمديه (ع‌ص‌م)، أڭ بيوك بر مقصدِ إنسانى و أڭ مهمّ بر وظيفۀِ بشريه اولديغى تحقّق ايدر.

اون برنجى نكته: ”اوچ مسئله“در.

برنجى مسئله: رسولِ أكرم عليه الصلاة والسلامڭ سنّتِ سنيه‌سنڭ منبعى اوچدر: أقوالى، أفعالى، أحواليدر. بو اوچ قسم دخى، اوچ قسمدر: فرائض، نوافل، عاداتِ حسنه‌سيدر. فرض و واجب قسمنده إتّباعه مجبوريت وار؛ تركنده، عذاب و عقاب واردر. هركس اوڭا إتّباعه مكلّفدر. نوافل قسمنده، أمرِ إستحبابى ايله ينه أهلِ ايمان مكلّفدر. فقط، تركنده عذاب و عقاب يوقدر. فعلنده و إتّباعنده عظيم ثوابلر وار و تغيير و تبديلى بدعه و ضلالتدر و بيوك خطادر. عاداتِ سنيه‌سى و حركاتِ مستحسنه‌‌سى ايسه حكمةً، مصلحةً، حياتِ شخصيه و نوعيه و إجتماعيه إعتباريله اونى تقليد و إتّباع ايتمك، غايت مستحسندر. چونكه هر بر حركتِ عاديه‌سنده، چوق منفعتِ حياتيه بولونديغى گبى، متابعت ايتمكله او آداب و عادتلر، عبادت حكمنه گچر. أوت مادام دوست و دشمنڭ إتّفاقيله، ذاتِ أحمديه (ع‌ص‌م) محاسنِ أخلاقڭ أڭ يوكسك مرتبه‌لرينه مظهردر. و مادام بِالإتّفاق نوعِ بشر ايچنده أڭ مشهور و ممتاز بر شخصيتدر. و مادام بيڭلر معجزاتڭ دلالتيله و تشكيل ايتديگى عالمِ إسلاميتڭ و كمالاتنڭ شهادتيله و مبلّغ و ترجمان اولديغى قرآنِ حكيمڭ حقائقنڭ تصديقيله، أڭ مكمّل بر إنسانِ كامل و بر مرشدِ أكملدر. و مادام ثمرۀِ إتّباعيله ميليونلر أهلِ كمال، مراتبِ كمالاتده ترقّى ايدوب سعادتِ داريْنه واصل اولمشلردر. ألبته او ذاتڭ سنّتى، حركاتى، إقتدا ايديله‌جك أڭ گوزل نمونه‌لردر و تعقيب ايديله‌جك أڭ صاغلام رهبرلردر و دستور إتّخاذ ايديله‌جك أڭ محكم قانونلردر. بختيار اودر كه، بو إتّباعِ سنّتده حصّه‌سى زياده اوله. سنّته إتّباع ايتمه‌ين، تنبللك ايدر ايسه، خسارتِ عظيمه؛ أهمّيتسز گورور ايسه، جنايتِ عظيمه؛ تكذيبنى إشمام ايدن تنقيد ايسه، ضلالتِ عظيمه‌در.