ايشته إقتصاد و قناعت، حكمتِ إلٰهيه‌يه توفيقِ حركتدر. قوّۀِ ذائقه‌يى قپوجى حكمنده طوتوب، اوڭا گوره بخشيش ويرر. إسراف ايسه؛ او حكمته ضد حركت ايتديگى ايچون چابوق طوقات ير، معده‌يى قاريشديرر، إشتهاىِ حقيقى‌يى غائب ايدر. تنوّعِ أطعمه‌دن گلن صنعى بر إشتهاىِ كاذبه ايله يديرر، هضمسزلغه سببيت ويرر، خسته ايدر.

اوچنجى نكته: سابق ايكنجى نكته‌ده، قوّۀِ ذائقه قپوجيدر ديدك. أوت أهلِ غفلت و روحًا ترقّى ايتمه‌ين و شكر مسلگنده ايلرى گيتمه‌ين إنسانلر ايچون بر قپوجى حكمنده‌در. اونڭ تلذّذى خاطرى ايچون إسرافاته و بر درجه‌دن اون درجه فيآته چيقمه‌مق گركدر. فقط، حقيقى أهلِ شكرڭ و أهلِ حقيقتڭ و أهلِ قلبڭ قوّۀِ ذائقه‌سى (آلتنجى سوزده‌كى موازنه‌ده بيان ايديلديگى گبى، قوّۀِ ذائقه‌سى) رحمتِ إلٰهيه‌نڭ مطبخلرينه بر ناظر و بر مفتّش حكمنده‌در. و او قوّۀِ ذائقه‌ده طعاملر عددنجه ميزانجقلرله نعمتِ إلٰهيه‌نڭ أنواعنى طارتمق و طانيمق؛ بر شكرِ معنوى صورتنده جسده، معده‌يه خبر ويرمكدر. ايشته بو صورتده قوّۀِ ذائقه، يالڭز مادّى جسده باقمييور. بلكه قلبه، روحه، عقله دخى باقديغى جهتله معده‌نڭ فوقنده حكمى وار، مقامى وار

إسراف ايتمه‌مك شرطيله و صِرف وظيفۀِ شكرانيه‌يى يرينه گتيرمك و أنواعِ نعمِ إلٰهيه‌يى حسّ ايدوب طانيمق قيدى ايله و مشروع اولمق و ذلّت و ديلنجيلگه وسيله اولمامق شرطيله، لذّتنى تعقيب ايده‌بيلير. و او قوّۀِ ذائقه‌يى طاشييان لسانى، شكرده إستعمال ايتمك ايچون لذيذ طعاملرى ترجيح ايده‌بيلير. بو حقيقته إشارت ايدن بر حادثه و بر كرامتِ غوثيه