بو مهمّ مرضڭ مرهمى و علاجى: ”الحُبُّ فِى اﷲ“ سرّيله، طريقِ حقده گيدنلره رفاقتله إفتخار ايتمك و آرقه‌لرندن گيتمك و إماملق شرفنى اونلره بيراقمق و او حق يولنده كيم اولورسه اولسون كندندن داها ايى اولديغنڭ إحتماليله أنانيتندن واز گچوب إخلاصى قزانمق و إخلاص ايله بر درهم عمل، إخلاصسز بطمانلر ايله عمللره راجح اولديغنى بيلمكله و تابعيتى دخى سببِ مسئوليت و خطرلى اولان متبوعيته ترجيح ايتمكله او مرضدن قورتولور و إخلاصى قزانير، وظيفۀِ اُخرويه‌سنى حقّيله ياپابيلير

بشنجى سبب: أهلِ هدايتڭ إختلافى و عدمِ إتّفاقى ضعفلرندن اولماديغى گبى؛ أهلِ ضلالتڭ قوّتلى إتّفاقى ده قوّتلرندن دگلدر. بلكه أهلِ هدايتڭ إتّفاقسزلغى، ايمانِ كاملدن گلن نقطۀِ إستناد و نقطۀِ إستناددن نشئت ايدن قوّتدن ايلرى گلديگى گبى؛ أهلِ غفلت و أهلِ ضلالتڭ إتّفاقلرى، قلبًا نقطۀِ إستناد بولمادقلرى إعتباريله ضعف و عجزلرندن ايلرى گلمشدر. چونكه ضعيفلر إتّفاقه محتاج اولدقلرى ايچون، قوّتلى إتّفاق ايدرلر. قويلر إحتياجى تام حسّ ايتمدكلرندن، إتّفاقلرى ضعيفدر. آرسلانلر، تيلكيلر گبى إتّفاقه محتاج اولمادقلرى ايچون فردى ياشايورلر. يبانى كچيلر، قوردلردن محافظه ايچون، بر سورى تشكيل ايدرلر. ديمك ضعيفلرڭ جمعيتى و شخصِ معنويسى قوى اولديغى گبى، (حاشيه) قويلرڭ جمعيتى و شخصِ معنويسى ايسه ضعيفدر

-----------------------------------------------------------------------------

حاشيه : آوروپا قوميته‌لرى ايچنده أڭ شدّتليسى و أڭ تأثيرليسى و بر جهتده أڭ قوّتليسى، جنسِ لطيف و ضعيف و نازك اولان قادينلرڭ آمريقاده‌كى حقوق و حرّيتِ نسوان قوميته‌سى اولديغى؛ هم ملّتلر ايچنده آز و ضعيف اولان أرمنيلرڭ قوميته‌سى، گوستردكلرى قوّتلى فداكارانه وضعيتله بو مدّعامزى تأييد ايدييور