بو سرّه بر إشارتِ لطيفه و ظريف بر نكتۀِ قرآنيه‌در كه فرمان ايتمش: {وَ قَالَ نِسْوَةٌ فِى الْمَدِينَةِ} مؤنّثلرڭ جماعتنه، ايكى قاتلى مؤنّث اولديغى حالده، مذكّر فعلى اولان {قَالَ} بيورماسى؛ هم {قَالَتِ اْلاَعْرَابُ} بيورمقله مذكّرلرڭ جماعتنه، مؤنّث فعلى اولان {قَالَتْ} تعبيريله، لطيفانه إشارت ايدييور كه: ضعيف و حليم و يوموشاق قادينلرڭ جمعيتى قوّتلشير، سرتلك و شدّت كسب ايدوب بر نوع رجوليت قزانير. مذكّر فعلنى إقتضا ايتديگندن {وَ قَالَ نِسْوَةٌ} تعبيريله، غايت گوزل دوشمش. قوى أرككلر ايسه، خصوصًا بدوى أعراب اولسه؛ قوّتلرينه گووندكلرى ايچون جمعيتلرى ضعيف اولوب هم إحتياطكارلق، هم يوموشاقلق وضعيتنى آلديغندن، بر نوع قادينلق خاصيتى طاقيندقلرى ايچون، مؤنّث فعلنى إقتضا ايتديگندن {قَالَتِ اْلاَعْرَابُ} مؤنّث فعليله تعبيرى تام يرنده‌در.

أوت أهلِ حق غايت قوّتلى بر نقطۀِ إستناد اولان ايمانِ بِاللّٰهدن گلن توكّل و تسليم ايله، باشقه‌لره عرضِ إحتياج ايدوب، معاونت و يارديملرينى ايسته‌مز. ايسته‌سه ده غايت فداكارانه ياپيشماز. أهلِ دنيا، دنيا ايشلرنده حقيقى نقطۀِ إستنادلرندن غفلت ايتدكلرندن، ضعف و عجزه دوشوب، شدّتلى بر صورتده يارديمجيلره إحتياجنى حسّ ايدر؛ صميمانه، بلكه فداكارانه إتّفاق ايدرلر.

ايشته أهلِ حق، إتّفاقده‌كى حق قوّتنى دوشونمدكلرندن و آرامدقلرندن، حقسز و مضر بر نتيجه اولان إختلافه دوشرلر. حقسز أهلِ ضلالت ايسه؛ إتّفاقده‌كى قوّتى، عجزلرى واسطه‌سيله حسّ ايتدكلرندن، غايت مهمّ بر وسيلۀِ مقاصد اولان إتّفاقى ألده ايتمشلر