أسكى آرقداشلريمزدن بر آدمڭ، بر آدمه قارشى عداوتى واردى. او آدمڭ ياننده ثناكارانه اونڭ دشمنى عملِ صالحله، حتّى ولايتله توصيف ايديلدى. او آدم قيصقانمدى، صيقيلمدى. صوڭره بريسى ديدى: ”سنڭ او دشمنڭ جسوردر، قوّتليدر.“ باقدق كه او آدمده شدّتلى بر قيصقانجلق و بر رقابت طمارى اوياندى. اوڭا ديدك: ”ولايت و صلاحت حدسز بر حياتِ أبديه‌نڭ پيرلانطه‌سى گبى بر قوّت و بر يوكسكلكدر. سن بوڭا بو جهتده قيصقانمدڭ. دنيوى قوّت اوكوزده و جسارت جاناوارده دخى بولونمقله برابر، ولايت و صلاحته نسبةً؛ بر عادى جام پارچه‌سنڭ ألماسه نسبتى گبيدر.“ او آدم ديدى كه: ”بر نقطه‌يه، بر مقامه ايكيمز بو دنياده گوزيمزى ديكمشز. اورايه چيقمق ايچون باصامقلريمز ده قوّت و جسارت گبى شيلردر. اونڭ ايچون قيصقاندم. آخرت مقاماتى حدسزدر. او بوراده بنم دشمنم ايكن، اوراده بنم صميمى و سَوْگيلى قارداشم اولابيلير.“

أى أهلِ حقيقت و طريقت! حقّه خدمت، بيوك و آغير بر دفينه‌يى طاشيمق و محافظه ايتمك گبيدر. او دفينه‌يى اوموزنده طاشييانلره نه قدر قوّتلى أللر يارديمه قوشسه‌لر داها زياده سَوينير، ممنون اولورلر. قيصقانمق شويله طورسون، غايت صميمى بر محبّتله او گلنلرڭ كنديلرندن داها زياده اولان قوّتلرينى و داها زياده تأثيرلرينى و يارديملرينى مفتخرانه آلقيشلامق لازم گليركن، نه‌دندر كه رقابتكارانه او حقيقى قارداشلره و فداكار يارديمجيلره باقيلييور و او حال ايله إخلاص قاچييور. وظيفه‌ڭزده متّهم اولوب، أهلِ ضلالتڭ نظرنده، سزدن و سزڭ مسلگڭزدن يوز درجه آشاغى اولان، دين ايله دنيايى قزانمق و علمِ حقيقتله معيشتى تأمين ايتمك، طمع و حرص يولنده رقابت ايتمك گبى مدهش إتهاملره معروض قالييورسڭز.