بو اوزون ماجرايى، إختيارلغمڭ رجا قپولرى ايچنده درجى، عادتا إختيارمله اولمادى. ايسته‌مييوردم، بلكه اوصانديره‌جق دييه چگينييوردم. فقط، بڭا يازديرلدى دييه‌بيليرم. (هر نه ايسه، صدده دونويورم.)

صاچ و صقالمده‌كى بياض قيللرڭ و بر وفادارڭ صداقتسزلگى نتيجه‌سنده او شعشعه‌لى و ظاهرًا طاتلى و سوسلى إستانبولڭ حياتِ دنيويه‌سنڭ أذواقندن بڭا بر نفرت گلدى. نفس، مفتون اولديغى أذواقڭ يرنده معنوى أذواق آرادى. بو أهلِ غفلتڭ نظرنده صوغوق و آغير و ناخوش گورونن إختيارلقده، بر تسلّى، بر نور ايستدى. فَلِلّٰهِ الْحَمْدُ جنابِ حقّه يوز بيڭ شكر اولسون، بتون او حقيقتسز، طاتسز، عاقبتسز أذواقِ دنيويه يرينه؛ حقيقى، دائمى و طاتلى أذواقِ ايمانيه‌يى {لاَ اِلٰهَ اِلاَّ هُو}ده و نورِ توحيدده بولديغم گبى.. أهلِ غفلتڭ نظرنده صوغوق و ثقيل گورونن إختيارلغى، او نورِ توحيد ايله چوق خفيف و حرارتلى و نورلى گوردم. أى إختيار و إختياره‌لر! مادام سزلرده ايمان وار و مادام ايمانى ايشيقلانديران و إنكشاف ايتديرن نماز و نياز وار؛ إختيارلغڭزه أبدى بر گنجلك نظريله باقه‌بيليرسڭز. چونكه اونڭله أبدى بر گنجلك قزانه‌بيليرسڭز. حقيقى صوغوق و ثقيل و چركين و ظلمتلى و ألملى اولان إختيارلق ايسه؛ أهلِ ضلالتڭ إختيارلقلريدر، بلكه ده اونلرڭ گنجلكلريدر. اونلر آغلامالى، اونلر ”وا أسفا وا حسرتا“ ديمه‌لى. سزلر، أى محترم ايمانلى إختيارلر! ”الحمد ِﷲِ على كلّ حال“ دييوب مسرورانه شكر ايتمه‌ليسڭز.

اون ايكنجى رجا: بر زمان إسپارطه ولايتنڭ بارلا ناحيه‌سنده نفى نامى آلتنده، إشكنجه‌لى بر أسارتله يالڭز و كيمسه‌سز بر كويده إختلاطدن و مخابره‌دن منع ايديلمش بر وضعيتده هم خسته‌لق، هم إختيارلق، هم ده غربت ايچنده غايت پريشان بر حالده ايكن؛ جنابِ حق كمالِ مرحمتندن، قرآنِ حكيمڭ نكته‌لرينه، سرلرينه دائر بنم ايچون مدارِ تسلّى بر نور إحسان ايتمشدى. اونڭله او آجى، أليم، حزين وضعيتمى اونوتمغه چاليشييوردم. وطنمى، أحبابمى، أقاربمى اونوته‌بيلييوردم. فقط وا حسرتا بريسنى اونوته‌مييوردم. او ده هم برادرزاده‌م، هم معنوى أولادم، هم أڭ فداكار طلبه‌م، هم أڭ جسور بر آرقداشم اولان مرحوم عبد الرحمن ايدى. آلتى يدى سنه أوّل بندن آيريلمشدى. نه او بنم يريمى بيلييور كه يارديمه قوشسون، تسلّى ويرسين و نه ده بن اونڭ وضعيتنى بيلييوردم كه، اونڭله مخابره ايده‌يم، دردلشه‌يم. بنم بو إختيارلق وضعيتى زمانمده؛ اويله فداكار، صادق بريسى بڭا لازمدى