الجواب: ”هر سويله‌ديگڭ طوغرى اولمق گركدر. فقط هر طوغرى‌يى سويله‌مك طوغرى دگلدر.“ قاعده‌سيله او مصيبتده آرقداشلريمڭ قسمًا إنكارلرينڭ و محكمه‌نڭ ألنده‌كى وثيقه‌لرينڭ تضييقى آلتنده آنجق او قدر طوغريلغى محافظه ايده‌بيلدم. قارداشلريمى تكذيب ايتمه‌مك و وثيقه‌لرڭ تكذيبنه اوغراتمامق ايچون سكوت ايتدم. سكوت ايسه خلاف صاييلماز. هم بتون مدافعاتمده آرا صيره گورونن ملايمانه و مصالحه‌كارانه (حاشيه) تعبيرلر ايسه ”تَوْرِيَه“ نوعندن اولارق محضًا معصوم قارداشلريمى قورتارمق ايچوندر. يوقسه معصوميتم و مظلوميتم بنى چوق شدّتلى قونوشديره‌جقدى. امّا قيصه‌جه مدافعاتمه قارشى محكمه و صورغو حاكملرينڭ إدّعانامه نامنده‌كى اوزون إتهامنامه‌لرى ايسه، اونلر اوچ درت آيده آنجق يازدقلرى إتهامنامه‌لرينه قارشى بتون مدافعاتم درت بش گونڭ محصولى اولديغى و آلتمش اوچ صحيفه‌لك صورغو حاكملرينڭ إتهامنامه و إدّعانامه‌لرينه قارشى قرق اوچ صحيفه‌لك إعتراضنامه‌م درت بش ساعتڭ محصوليدر. ألبته بو نسبتسز مقابله‌ده، بو مدافعات خارقه صاييلابيلير. قصورلرينه باقيلماز

--------------------------------------------------------------------

(حاشيه: حتّى لايحۀِ تمييزيه‌نڭ آخرنده اوچ صحيفه أوّل ”أگر پك حقلى بو فرياديمى عدليه‌نڭ يوكسك مقامى ايشيدوب ديڭله‌مزسه، شدّتِ مأيوسيتمدن دييه‌جگم: بو زمانده عدليه‌ده عدالت قالقييور. أى بنى بو بلايه سَوق ايدوب بو حادثه‌يى ايجاد ايدن إسپارطه مخبرلرى“ دييه اولان فقره‌يه قارداشلريمڭ خاطرى ايچون ”عدليه‌ده عدالت قالقييور.“ جمله‌سنى قالديرديغمدن او مقام مشوّش اولمش. هم ده بوراده‌كى محكمه‌يى گوجنديرمه‌مك ايچون، قارداشلريمڭ خاطرينه بناءً إسپارطه مخبرلرى نامنى بزه ظلم ايدن عموم ظالملره ويردم. حالبوكه شكرى قايا. هر نه ايسه