أى هيئتِ حاكمه! أگر بو إشكنجه‌لى توقيفم، يالڭز حياتِ دنيويه‌مه و شخصمه عائد اولسه ايدى؛ أمين اولڭز كه، اون سنه‌در سكوت ايتديگم گبى ينه سكوت ايده‌جكدم. فقط بو توقيفم، چوقلرڭ حياتِ أبديه‌لرينه و معظّم طلسمِ كائناتڭ كشفنى تفسير ايدن رسالۀِ نوره عائد اولديغندن، يوز باشم اولسه و هر گون برى كسيلسه، بو سرِّ عظيمدن واز گچميه‌جگم؛ و سزڭ ألڭزدن قورتولسه‌م، ألبته أجل پنچه‌سندن قورتولاميه‌جغم. بن إختيارم، قبر قپوسنده‌يم. ايشته او مدهش طلسمِ كائناتڭ كشّافى اولان قرآنِ حكيمڭ او معظّم كشفنى گوزه گوسترر بر صورتده تفسير ايدن رسالۀِ نور، او طلسمه عائد يوزر مسئله‌لرندن، بو هركسڭ باشنه گله‌جك اولان أجله و قبره عائد يالڭز بو سرِّ ايمانه باقڭز كه:

عجبا بو دنيانڭ بتون معظّم مسائلِ سياسيه‌سى، ئولومه أجله اينانان بر آدمه داها بيوك اولابيلير مى كه؛ بونى، اوڭا آلَت ايتسين. چونكه وقت معيّن اولماديغندن، هر وقت باش كسه‌بيلن أجل، يا إعدامِ أبديدر وياخود داها گوزل بر عالمه گيتمگه بر ترخيص تذكره‌سيدر. و هيچ بر وقت قپانميان قبر؛ يا هيچلك و ظلماتِ أبديه قويوسنڭ قپوسيدر وياخود داها دائمى و داها نورانى باقى بر دنيانڭ قپوسيدر.

ايشته رسالۀِ نور، كشفياتِ قدسيۀِ قرآنيه‌نڭ فيضيله، ايكى كرّه ايكى درت ايدر درجه‌سنده قطعيتله گوسترر كه، أجلى إعدامِ أبديدن ترخيص وثيقه‌سنه و قبرى ديبسز، هيچلك قويوسندن مزيَّن بر باغچه قپوسنه چويرمه‌سنڭ شبهه‌سز قطعى بر چاره‌سى وار. ايشته بو چاره‌يى بولمق ايچون، بتون دنيا سلطنتى بنم اولسه بِلا تردّد فدا ايدرم. أوت حقيقى عقلى باشنده اولان فدا ايدر