إدّعانامه‌ده، متعدّد منطقه‌لرده رسالۀِ نورڭ نشر و تعميمنه آدملر واسطه‌سيله چاليشديغم بيان ايديلييور. جوابًا ديرم كه:

بن بر كويده، غربتده، كيمسه‌سز، حسنِ خطّم يوق ايكن؛ ترصّد آلتنده، هركس بنم معاونتمدن چكينيركن؛ يالڭز غايت محدود درت بش أحبابمه بر يادگار اولارق خاطراتِ ايمانيه‌مى گوندرديگمه ”نشريات و تعميمنه چاليشييور“ ديمك، نه قدر خلافِ حقيقت اولديغنى ألبته تقدير ايدرسڭز. بنم گبى حدّندن چوق فضله توجّهِ عامّه‌يه مظهر بر إنسانڭ، اونبش سنه وانده تدريس ايله مشغول اولديغم حالده، بر تك دوستمه بر ايكى ايمانى رساله‌لريمى گوندرمكله بوڭا ناصل نشريات دينيلير؟ و بوتون آناطوليده بر آنطاليالى آشجى، بر ميلاسلى خانجى و إختيارلقدن عَتَهْ گتيرمش آيدينلى بر إختيارڭ إصرارلرينه بناءً ايمانى بر ايكى رساله‌يى گوندرمكله، ناصل نشريات دينيلير؟ بنم مطبعه‌م يوق، كاتبلرم يوق، حسنِ خطّم يوق، ألبته نشريات ياپامام. ديمك رسالۀِ نور جاذبه‌داردر، كندى كندينه إنتشار ايدييور. يالڭز بو قدر وار كه؛ ”اوننجى سوز“ نامنده حشره دائر اولان رساله‌يى، داها يڭى حروف چيقمه‌دن، سكز سنه أوّل طبع ايتديردك. حكومتڭ بيوك مأمورلرينڭ و مبعوثلرينڭ و واليلرڭ أللرينه گچدى، كيمسه إعتراض ايتمدى. اوندن، سكز يوز نسخه إنتشار ايتدى. حكومتڭ مساعده‌سندن إستفاده ايده‌رك هر طرفه گيتدى. اونڭ إنتشارى مناسبتيله، اونڭ گبى صِرف اُخروى و ايمانى بر قسم رساله‌لر، كندى كندينه محدود بر قسم إنسانلرڭ ألنه گچدى. ألبته إختيارسز، كندى كندينه بو إنتشار بنم خوشمه گيتمش. بن ده بعض خصوصى مكتوبلرمده، بو تقديريمى تشويق طرزنده يازمشم. بو اوچ آيدر، بو قدر تحرّياتِ عميقه نتيجه‌سنده، قوجه بر مملكتده، اونبش يگرمى آدمڭ أللرنده كتابلريمى بولمشلر. بنم گبى اوتوز سنه تأليفات و تدريساتله عمرى گچن بر آدمڭ، يگرمى خصوصى دوستنده بعض خصوصى رساله‌لرى بولونماسى، نه صورتله نشريات اولور؟ و او نشريات ايله ناصل بر هدفى تعقيب ايده‌بيلير دينيلير؟