يوز بيڭ دفعه حاشا!.. ايمان علمنى رضاىِ إلٰهيدن باشقه هيچ بر شيئه آلَت ايتمه‌مشم و ايده‌مييورم و كيمسه‌نڭ ده حقّى يوقدر كه ايده‌بيلسين. و رسالۀِ نور نامى آلتنده‌كى يوز يگرمى بش رساله، يگرمى سنه ظرفنده تأليف ايديلمش. و شيمدى نظرِ تنقيديڭزه ايليشن اون اونبش نقطه، سكز طوقوز سنه أوّل يازيلمشدى. داها او نقطه‌لرى تنقيد ايده‌جك قانونلرى چيقمامشدى. و هم او نقطه‌لرى عفو ايده‌جك عفو قانونلرى اونلر يازيلدقدن صوڭره چيقمش.

محرم ديديگمز رساله‌لر ايسه، اوچ دانه‌سى بزه غرور و ريايه مدار اولمامق ايچون محرم ديمشم. شيمدى ايسه، او سرِّ محرمڭ بر كوشه‌سنى فاش ايتمگه مجبور اولارق ديرم كه: او محرملردن بريسى، كرامتِ غوثيه‌يه؛ ايكنجى، كرامتِ عَلويه‌يه؛ اوچنجى، سرِّ إخلاصه عائد رساله‌لردر كه؛ او ايكى كرامت، بنم حدّمدن يوز درجه فضله و خدمتِ قرآنيه‌مى تقدير صورتنده حضرتِ على ايله حضرتِ غوثڭ إشارتلريدرلر. و ريادن و غروردن و أنانيتدن قورتاره‌جق سرِّ إخلاصه دائر رساله‌يه، أڭ خاص قارداشلريمه مخصوص اولارق، محرم دينمشدر. آسايشِ داخليه ايله بونلرڭ نه مناسبتى وار كه، اونلر مدارِ إتهامم اولويورلر؟

ايكنجى قسم محرملر ايسه؛ دار الحكمتده و طوقوز سنه أوّل آوروپا إعتراضاتنه و دوقتور عبد اﷲ جودتڭ دينسزجه هجوملرينه قارشى يازديغم بر ايكى رساله و بعض مأمورلرڭ بڭا إنصافسزجه و غدّارانه تجاوزلرينه قارشى شكوا صورتنده يازديغم ايكى كوچك رساله‌در كه؛ صوڭ مدافعاتمده بحث ايتمشم. بو درت رساله‌نڭ تأليفندن بر زمان صوڭره، بعض سربستى قانونلره و حكومتڭ ايشنه هيچ بر جهتله تماس ايتمه‌مك ايچون، اونلرڭ نشرينى منع ايدوب، قسمًا محرم ديمشم؛ أڭ خاص بر ايكى قارداشمه مخصوص قالمشدر. دليلم ده شودر كه: بو قدر تحرّياتڭزده، او محرم دينيلن رساله‌لرڭ هيچ بر يرده بولونماماسيدر. يالڭز عمومنڭ فهرسته‌سى ألڭزه گچمش، او فهرسته‌يه گوره بو نقطه‌لردن إستيضاحه لزوم گورولمش؛ بن ده جواب ويرمشدم، او جواب ده ضبطڭزه گچمشدر