إختيارلر رساله‌سنڭ يدنجى رجاسنده ذكر ايديلن غايت أهمّيتلى بر حقيقت آڭلاشيلمديغندن تنقيدكارانه إدّعانامه‌ده ذكر ايديلمش. بر كلمه‌سنه ياڭليش معنا ويريلمش. إستنطاقده بوڭا جواب ويرمشدم. بوراده بو قدر ديرم كه: بن او زمان آنقره‌يه دوستانه دوستلر ايچنه گيرمشدم. ألبته حكومته، آنقره‌يه تعريض صورتنده دگلدى. او وضعيتده آنقره‌ده او وقت بش إختيارلغڭ بنى إحاطه‌سيله كندى نفسمده أڭ قره بر حالتِ روحيه حسّ ايتدم ديمكدر. او كلمه‌دن صوڭره آلتى جهتمده وحشت و ظلمتلرڭ حسّ ايديلمه‌سى و صوڭره آلتى جهتده تنوّر ايتمه‌سى، سرِّ ايمان ايله إنسانڭ آلتى جهتى ناصل تنوّر ايتديگنى و غفلت و ضلالت ايسه ناصل او آلتى جهتى ظلمتلى و وحشتلى گوسترديگنى گوسترن اويله بر حقيقتِ عاليه‌در كه؛ دگل تنقيدكارانه اوڭا باقمق، بلكه عموم إنسانلر اوڭا تقديركارانه باقمق گركدر. ينه إدّعانامه‌ده اون بشنجى لمعه نامنده‌كى فهرسته رساله‌سنده آيتِ كريمه‌نڭ {لِلذَّكَرِ مِثْلُ حَظِّ اْلاُنْثَيَيْنِ ❊ فَِلاُمِّهِ السُّدُسُ} آيتلرينڭ أسكيدن بَرى مدنيتڭ إعتراضنه قارشى بتون تفسيرلرده بولونان بر حقيقتى دگل سكز سنه أوّل بلكه اونبش سنه أوّل و بو حكومتڭ قانونِ مدنى‌يى قبول ايتمه‌دن خيلى زمان أوّل ويرديگم غايت قطعى و شبهه‌سز بر جوابِ علمى، إدّعانامه‌ده بنم عليهمده ناصل إستعمال ايديله‌بيلير؟

إدّعانامه‌ده، ينه فهرسته‌دن نقلاً، حروفِ قرآنيه و ذكريه‌نڭ ترجمه‌لرى يرلرينى طوتمدقلرى مدارِ تنقيد بيان ايديلييور. بو مسئله، سكز سنه‌دن مقدَّم اولمش بر مسئله‌در و هيچ بر إعتراض قبول ايتمز بر حقيقتِ علميه‌در. اوندن خيلى زمان صوڭره، بو زمانڭ بعض مقتضياتنه گوره ترجمه ايديلمه‌سنڭ حكومتجه قبولى نه صورتله او حقيقتِ علميه‌يى عليهمه چويرر.