طوقوز سنه اوطورديغم بارلا كويى خلقنڭ مشاهده‌سيله و طوقوز آى إقامت ايتديگم إسپارطه‌ده‌كى دوستلريمڭ شهادتيله و بنى ياقيندن طانييان دوستلريمڭ إشهاديله؛ اون اوچ سنه‌در كه، سياست لسانى اولان هيچ بر غزته‌يى، نه اوقودم و نه ده ديڭله‌دم و نه ده ايستدم. حتّى مهمّ بر قاچ حادثه‌ده، شخصمله علاقه‌دار ظن ايديلن و هركسى مراقه سَوق ايدن واقعه‌لردن بحث ايدن غزته‌لرى اوقومق آرزوسى بولونمادى و اوقومدم و اوقوتمديغمله برابر يوز رساله ايچنده اون اونبش مادّه‌دن باشقه بتون مسائلى، آخرتمه و ايمانه و حقيقته متوجّه اولديغى حكومتڭ تدقيقاتِ عميقه‌سيله تظاهر ايدن رسالۀِ نور سكز طوقوز سنه أوّل حكومتجه قانونِ مدنى قبول ايديلمه‌دن و مدارِ تنقيد بولونان او اون اونبش مادّه‌يى ياساق ايده‌جك قانونلر چيقمادن أوّل يازيلديغى حالده، سعيد رسالۀِ نور ايله دينى سياسته آلَت ايدييور؛ يعنى كائناتده أڭ يوكسك و مقدّس طانيديغى بر حقيقتِ قدسيه اولان دينِ حقّى و ايمانِ تحقيقى‌يى سياسته، يعنى إختلالكارانه، أڭ تهلكه‌لى و أڭ گناهلى و چوق حقوقڭ ضياعنه سببيت ويرن عقيم، سفلى بر مقصده آلَت ايتمش دينيلير مى؟ بويله ديينلر، نه قدر دائرۀِ عقل و إنصاف و وجداندن اوزاق دوشدكلرى و اوزاق حكم ايتدكلرى آڭلاشيلماز مى؟

ألبته بو يوكسك محكمۀِ عدالت، بويله أصلسز و أوهام إسناداتلرى رفع ايدوب، حقّمزده إحقاقِ حق ايده‌جكدر. گرچه قانونلرى بيلمه‌مك أكثره گوره بر معذرت تشكيل ايتمز. فقط حقسز اولارق، هجرا بر كويده، ترصّد آلتنده، يابانجى بر يرده، دنيادن شدّتلى كوسديروب، نفى ايله إقامت ايتديروب، متماديًا ترصّد ايله تعجيز ايديلن بر آدمڭ قانونلرى بيلمه‌مسى؛ ألبته أهلِ إنصافڭ نظرنده بر عذر تشكيل ايدر

ايشته بن او آدمم. و بنى ياڭليش وهم ايله مؤاخذه ايتدكلرى موادِّ قانونيه‌نڭ هيچ بريسنى بيلمزدم. حتّى يڭى حروفله إمضامى آتامازدم. بعضًا خدمتجمدن باشقه، اون گونده بر آدم ايله گوروشه‌مزدم. هركس بڭا معاونتدن قاچار. آووقات طوتمغه إقتدارم يوق. بتون حياتمده ”أڭ منفعتلى و أڭ ايى حيله، حيله‌سزلك اولديغى“ دستورى اولديغندن، بتون مدافعاتمده حق و حقيقت و صدق و طوغريلق أساسنى تعقيب ايتدم. بو حقيقته بناءً، بنم مدافعاتمده وياخود نادرًا بعض بر ايكى رساله‌مده، زمانِ حاضرڭ قانونلرينه و رسمى مراسملرينه توافق ايتمه‌ين إفاداتمه نظرِ مسامحه ايله باقمق عدالتڭ مقتضيات و ايجاباتندندر. بنم بو مدافعاتمده مجمل قالان نقطه‌لر، إدّعانامه‌يه قارشى يازديغم إعتراضنامه‌مده واردر و إعتراضنامه‌مده مجمل قالان نقطه‌لرڭ، بو صوڭ مدافعاتمده ايضاحاتى واردر؛ بربرينى تكميل ايدر